ಅಸಮಾಹಿತಸ್ಯಾಪಿ ಬುದ್ಧಿಮಾತ್ರಮುತ್ಪದ್ಯಮಾನಂ ಪ್ರತಿಭಾತಿ, ಇತ್ಯಾಶಂಕ್ಯ ವಿಶಿನಷ್ಟಿ -
ಆತ್ಮಸ್ವರೂಪೇತಿ ।
ನಹಿ ವಿಕ್ಷಿಪ್ತಚಿತ್ತಸ್ಯ ಆತ್ಮಸ್ವರೂಪವಿಷಯಾ ಬುದ್ಧಿರುದೇತುಮರ್ಹತಿ, ಇತ್ಯತ್ರ ಹೇತುಮಾಹ -
ನಚೇತಿ ।
ಆತ್ಮಜ್ಞಾನೇ ಶಬ್ದಾದಾಪಾತತೋ ಜಾತೇ, ಸ್ಮೃತಿಸಂತಾನಕರಣಂ ಸಾಕ್ಷಾತ್ಕಾರಾರ್ಥಮಭಿನಿವೇಶೋ ಭಾವನೇತಿಚೋಚ್ಯತೇ । ನ ಚಾಸೌ ವಿಕ್ಷಿಪ್ತಬುದ್ಧೇಃ ಸಿಧ್ಯತಿ, ಇತಿ ಹೇತ್ವರ್ಥಂ ವಿವಕ್ಷಿತ್ವಾಹ -
ಆತ್ಮಜ್ಞಾನೇತಿ ।
ಭಾವನಾದ್ವಾರಾ ಸಾಕ್ಷಾತ್ಕಾರಾಭಾವೇಽಪಿ ಕಾ ಕ್ಷತಿಃ ? ಇತ್ಯಾಶಂಕ್ಯಾಹ -
ತಥೇತಿ ।
ಅಸಮಾಹಿತಸ್ಯ ಭಾವನಾಭಾವವದಿತಿ ಯಾವತ್ ।
ಆತ್ಮನಿ ಆಪಾತತೋ ಜ್ಞಾತೇ ಶ್ರವಣಾದ್ಯಾವೃತ್ತಿರೂಪಾಂ ಸ್ಮೃತಿಮ್ ಅನಾತನ್ವಾನಸ್ಯ ಅಪರೋಕ್ಷಬುದ್ಧ್ಯಭಾವೇ, ನ ಅನರ್ಥನಿವೃತ್ತಿಃ ಸಿಧ್ಯತೀತ್ಯಾಹ -
ಉಪಶಮ ಇತಿ ।
ಅನಿವೃತ್ತಾನರ್ಥಸ್ಯ ಪರಮಾನಂದಸಾಗರಾದ್ವಿಭಕ್ತಸ್ಯ ಸಂಸಾರವಾರಿಧೌ ನಿಮಗ್ನಸ್ಯ ಸುಖಾವಿರ್ಭಾವೋ ನ ಸಂಭವತೀತ್ಯಾಹ -
ಅಶಾಂತಸ್ಯೇತಿ ।
ತಸ್ಯಾಪಿ ವಿಷಯಸೇವಾತೋ ವೈಷಯಿಕಂ ಸುಖಂ ಸಂಭವತಿ, ಇತ್ಯಾಶಂಕ್ಯಾಹ -
ಇಂದ್ರಿಯಾಣಾಂ ಹೀತಿ ।
ತೃಷ್ಣಾಕ್ಷಯಸ್ಯ ಶಾಸ್ತ್ರಪ್ರಸಿದ್ಧಮಾನುಭವಿಕಂ ಚ ಸುಖತ್ವಮಿತಿ ವಕ್ತುಂ ಹಿಶಬ್ದಃ ।
ವಿಷಯಸೇವಾತೃಷ್ಣಯಾಪಿ ವಿಷಯೋಪಭೋಗದ್ವಾರಾ ಸುಖಮುಪಲಬ್ಧಮ್ , ಇತ್ಯಾಶಂಕ್ಯಾಹ -
ದುಃಖಮೇವೇತಿ ।
ತತ್ರಾಪಿ ಹಿಶಬ್ದಃ ಅನುಭವದ್ಯೋತೀ ।
ತದೇವ ಸ್ಪಷ್ಟಯತಿ -
ನೇತ್ಯಾದಿನಾ
॥ ೬೬ ॥