अद्वैतशारदा | दक्षिणाम्नाय श्रीशारदापीठम्, शृङ्गेरी

ಯಾ ನಿಶಾ ಸರ್ವಭೂತಾನಾಂ ತಸ್ಯಾಂ ಜಾಗರ್ತಿ ಸಂಯಮೀ ।
ಯಸ್ಯಾಂ ಜಾಗ್ರತಿ ಭೂತಾನಿ ಸಾ ನಿಶಾ ಪಶ್ಯತೋ ಮುನೇಃ ॥ ೬೯ ॥

ಯಾ ನಿಶಾ ರಾತ್ರಿಃ ಸರ್ವಪದಾರ್ಥಾನಾಮವಿವೇಕಕರೀ ತಮಃಸ್ವಭಾವತ್ವಾತ್ ಸರ್ವಭೂತಾನಾಂ ಸರ್ವೇಷಾಂ ಭೂತಾನಾಮ್ । ಕಿಂ ತತ್ ಪರಮಾರ್ಥತತ್ತ್ವಂ ಸ್ಥಿತಪ್ರಜ್ಞಸ್ಯ ವಿಷಯಃ । ಯಥಾ ನಕ್ತಂಚರಾಣಾಮ್ ಅಹರೇವ ಸದನ್ಯೇಷಾಂ ನಿಶಾ ಭವತಿ, ತದ್ವತ್ ನಕ್ತಂಚರಸ್ಥಾನೀಯಾನಾಮಜ್ಞಾನಾಂ ಸರ್ವಭೂತಾನಾಂ ನಿಶೇವ ನಿಶಾ ಪರಮಾರ್ಥತತ್ತ್ವಮ್ , ಅಗೋಚರತ್ವಾದತದ್ಬುದ್ಧೀನಾಮ್ । ತಸ್ಯಾಂ ಪರಮಾರ್ಥತತ್ತ್ವಲಕ್ಷಣಾಯಾಮಜ್ಞಾನನಿದ್ರಾಯಾಃ ಪ್ರಬುದ್ಧೋ ಜಾಗರ್ತಿ ಸಂಯಮೀ ಸಂಯಮವಾನ್ , ಜಿತೇಂದ್ರಿಯೋ ಯೋಗೀತ್ಯರ್ಥಃ । ಯಸ್ಯಾಂ ಗ್ರಾಹ್ಯಗ್ರಾಹಕಭೇದಲಕ್ಷಣಾಯಾಮವಿದ್ಯಾನಿಶಾಯಾಂ ಪ್ರಸುಪ್ತಾನ್ಯೇವ ಭೂತಾನಿ ಜಾಗ್ರತಿ ಇತಿ ಉಚ್ಯಂತೇ, ಯಸ್ಯಾಂ ನಿಶಾಯಾಂ ಪ್ರಸುಪ್ತಾ ಇವ ಸ್ವಪ್ನದೃಶಃ, ಸಾ ನಿಶಾ ಅವಿದ್ಯಾರೂಪತ್ವಾತ್ ಪರಮಾರ್ಥತತ್ತ್ವಂ ಪಶ್ಯತೋ ಮುನೇಃ ॥

ತಮಃಸ್ವಭಾವತ್ವಾದಿತಿ ; ಕಿಂ ತದಿತ್ಯಾದಿನಾ ; ಯಥೇತಿ ; ಅಗೋಚರತ್ವಾದಿತಿ ; ತಸ್ಯಾಮಿತಿ ; ಯಸ್ಯಾಮಿತಿ ; ಪ್ರಸುಪ್ತಾ ಇವೇತಿ ; ಅವಿದ್ಯಾರೂಪತ್ವಾದಿತಿ ;

ಸರ್ವಪ್ರಾಣಿನಾಂ ನಿಶಾ ಪದಾರ್ಥಾವಿವೇಕಕರೀ ಇತ್ಯತ್ರ ಹೇತುಮಾಹ -

ತಮಃಸ್ವಭಾವತ್ವಾದಿತಿ ।

ಸರ್ವಪ್ರಾಣಿಸಾಧಾರಣೀಂ ಪ್ರಸಿದ್ಧಾಂ ನಿಶಾಂ ದರ್ಶಯಿತ್ವಾ, ತಾಮೇವ ಪ್ರಕೃತಾನುಗುಣತ್ವೇನ ಪ್ರಶ್ನಪೂರ್ವಕಂ ವಿಶದಯತಿ -

ಕಿಂ ತದಿತ್ಯಾದಿನಾ ।

ಸ್ಥಿತಪ್ರಜ್ಞವಿಷಯಸ್ಯ ಪರಮಾರ್ಥತತ್ತ್ವಸ್ಯ ಪ್ರಕಾಶೈಕಸ್ವಭಾವಸ್ಯ ಕಥಮಜ್ಞಾನಂ ಪ್ರತಿ ನಿಶಾತ್ವಮ್ ? ಇತ್ಯಾಶಂಕ್ಯಾಹ -

ಯಥೇತಿ ।

ತತ್ರ ಹೇತುಮಾಹ-

ಅಗೋಚರತ್ವಾದಿತಿ ।

ಅತದ್ಬುದ್ಧೀನಾಂ ಪರಮಾರ್ಥತತ್ತ್ವಾತಿರಿಕ್ತೇ ದ್ವೈತಪ್ರಪಂಚೇ ಪ್ರವೃತ್ತಬುದ್ಧೀನಾಮ್ ಅಪ್ರತಿಪನ್ನತ್ವಾತ್ ಪರಮಾರ್ಥತತ್ತ್ವಂ ನಿಶೇವ ಅವಿದುಷಾಮಿತ್ಯರ್ಥಃ ।

ತಸ್ಯಾಮಿತ್ಯಾದಿ ವ್ಯಾಚಷ್ಟೇ -

ತಸ್ಯಾಮಿತಿ ।

ನಿಶಾವದುಕ್ತಾಯಾಮವಸ್ಥಾಯಾಮಿತಿ ಯಾವತ್ । ಯೋಗೀತಿ ಜ್ಞಾನೀ ಕಥ್ಯತೇ ।

ದ್ವಿತೀಯಾರ್ಧಂ ವಿಭಜತೇ -

ಯಸ್ಯಾಮಿತಿ ।

ಪ್ರಸುಪ್ತಾನಾಂ ಜಾಗರಣಂ ವಿರುದ್ಧಮ್ , ಇತ್ಯಾಶಂಕ್ಯಾಹ -

ಪ್ರಸುಪ್ತಾ ಇವೇತಿ ।

ಪರಮಾರ್ಥತತ್ತ್ವಮನುಭವತೋ ನಿವೃತ್ತಾವಿದ್ಯಸ್ಯ ಸಂನ್ಯಾಸಿನೋ ದ್ವೈತಾವಸ್ಥಾ ನಿಶಾ ಇತ್ಯತ್ರ ಹೇತುಮಾಹ -

ಅವಿದ್ಯಾರೂಪತ್ವಾದಿತಿ ।