ತರ್ಹಿ ವಿಭಾಗವಚನಾನುರೋಧಾದರ್ಜುನಸ್ಯಾಪಿ ಸಂನ್ಯಾಸಪೂರ್ವಿಕಾಯಾಂ ಜ್ಞಾನನಿಷ್ಠಾಯಾಮೇವಾಧಿಕಾರೋ ಭವಿಷ್ಯತಿ, ನೇತ್ಯಾಹ -

ಮಾಂ ಚೇತಿ ।

ಬುದ್ಧೇರ್ಜ್ಯಾಯಸ್ತ್ವಮುಪೇತ್ಯಾಪೀತಿ ಚಕಾರಾರ್ಥಃ । ಅರ್ಜುನಮಾಲಕ್ಷ್ಯ ಭಗವಾನಾಹೇತಿ ಸಂಬಂಧಃ ।

ಅಂತರೇಣಾಪಿ ಕರ್ಮಾಣಿ, ಶ್ರವಣಾದಿಭಿರ್ಜ್ಞಾನಾವಾಪ್ತಿರ್ಭವಿಷ್ಯತೀತಿ ಪರಬುದ್ಧಿಮನುರುಧ್ಯ ವಿಶಿನಷ್ಟಿ -

ಕರ್ಮೇತಿ ।

ವಿಭಾಗವಚನವಶಾದಸಮುಚ್ಚಯಶ್ಚೇದ್ ಉಭಯೋರಪಿ ಜ್ಞಾನಕರ್ಮಣೋಃ ಸ್ವಾತಂತ್ರ್ಯೇಣ ಪುರುಷಾರ್ಥಹೇತುತ್ವಮ್ , ಅನ್ಯಥಾ ಕರ್ಮವದ್ ಜ್ಞಾನಮಪಿ ನ ಸ್ವಾತಂತ್ರ್ಯೇಣ ಪುರುಷಾರ್ಥಂ ಸಾಧಯೇದ್ ಇತ್ಯಾಶಂಕ್ಯ ಸಂಬಂಧಾಂತರಮಾಹ -

ಅಥವೇತಿ ।

ತರ್ಹಿ ಜ್ಞಾನನಿಷ್ಠಾಽಪಿ ಕರ್ಮನಿಷ್ಠಾವನ್ನಿಷ್ಠಾತ್ವಾವಿಶೇಷಾನ್ನ ಸ್ವಾತಂತ್ರ್ಯೇಣ ಪುರುಷಾರ್ಥಹೇತುರಿತಿ । ಸಮುಚ್ಚಯಸಿದ್ಧಿರಿತ್ಯಾಶಂಕ್ಯಾಹ -

ಜ್ಞಾನನಿಷ್ಠಾ ತ್ವಿತಿ ।

ನಹಿ ರಜ್ಜುತತ್ತ್ವಜ್ಞಾನಮುತ್ಪನ್ನಂ ಫಲಸಿದ್ಧೌ ಸಹಕಾರಿಸಾಪೇಕ್ಷಮಾಲಕ್ಷ್ಯತೇ । ತಥೇದಮಪಿ ಚ ಉತ್ಪನ್ನಂ ಮೋಕ್ಷಾಯ ನಾನ್ಯದಪೇಕ್ಷತೇ । ತದಾಹ -

ಅನ್ಯೇತಿ ।