‘ನ ಕರ್ಮಣಾಮನಾರಂಭಾತ್’ (ಭ. ಗೀ. ೩-೪) ಇತ್ಯಾದಿನೋಕ್ತಮುಪಸಂಹರತಿ -
ತಸ್ಮಾದಿತಿ ।
ಜಗಚ್ಚಕ್ರಸ್ಯ ಪ್ರಾಗುಕ್ತಪ್ರಕಾರೇಣಾನುವರ್ತನೇ ವೃಥಾ ಜೀವನಮಘಸಾಧನಂ ಯಸ್ಮಾತ್ ತಸ್ಮಾಜ್ಜೀವತಾ ನಿಯತಂ ಕರ್ಮ ಕರ್ತವ್ಯಮಿತ್ಯರ್ಥಃ ।
ಯದ್ಯಧಿಕೃತೇನ ಕರ್ತವ್ಯಮೇವ ಕರ್ಮ, ತರ್ಹಿ ಕಿಮಿತಿ ಅಜ್ಞೇನೇತಿ ವಿಶಿಷ್ಯತೇ ? ಜ್ಞಾನನಿಷ್ಟೇನಾಪಿ ತತ್ ಕರ್ತವ್ಯಮೇವಾಧಿಕೃತತ್ವಾವಿಶೇಷಾದಿತ್ಯಾಶ್ಂಕ್ಯ, ಪೂರ್ವೋಕ್ತಮನುವದತಿ -
ಪ್ರಾಗಿತಿ ।
ನಹಿ ಜ್ಞಾನಕರ್ಮಣೋರ್ವಿರೋಧಾಜ್ಜ್ಞಾನನಿಷ್ಠೇನ ಕರ್ಮ ಕರ್ತುಂ ಶಕ್ಯತೇ । ತಥಾ ಚಾನಾತ್ಮಜ್ಞೇನೈವ ಚಿತ್ತಶುದ್ಧ್ಯಾದಿಪರಂಪರಯಾ ಜ್ಞಾನಾರ್ಥಂ ಕರ್ಮಾನು್ಷ್ಠೇಯಮಿತಿ ಪ್ರತಿಪಾದಿತಮಿತ್ಯರ್ಥಃ ।
ತರ್ಹಿ ‘ಯಜ್ಞಾರ್ಥಾತ್’ (ಭ. ಗೀ. ೩-೯) ಇತ್ಯಾದಿ ಕಿಮರ್ಥಂ, ನಹಿ ತತ್ರ ಜ್ಞಾನನಿಷ್ಠಾ ಪ್ರತಿಪಾದ್ಯತೇ, ಕರ್ಮನಿಷ್ಠಾ ತು ಪೂರ್ವಮೇವೋಕ್ತತ್ವಾನ್ನಾತ್ರ ವಕ್ತವ್ಯೇತ್ಯಾಶಂಕ್ಯ, ವೃತ್ತಮರ್ಥಾಂತರಮನುವದತಿ -
ಪ್ರತಿಪಾದ್ಯೇತಿ ।
ಪ್ರಾಸಂಗಿಕಮ್ - ಅಜ್ಞಸ್ಯ ಕರ್ಮಕರ್ತವ್ಯತೋಕ್ತಿಪ್ರಸಂಗಾದಾಗತಮಿತಿ ಯಾವತ್ । ಬಹುಕಾರಣಮ್ - ಈಶ್ವರಪ್ರಸಾದೋ ದೇವತಾಪ್ರೀತಿಶ್ಚೇತ್ಯಾದಿ । ದೋಷಸಂಕೀರ್ತನಂ - ‘ತೈರ್ದತ್ತಾನ್ ಅಪ್ರದಾಯ’ (ಭ. ಗೀ. ೩-೧೨) ಇತ್ಯಾದಿ ॥ ೧೬ ॥