‘న కర్మణామనారమ్భాత్’ (భ. గీ. ౩-౪) ఇత్యాదినోక్తముపసంహరతి -
తస్మాదితి ।
జగచ్చక్రస్య ప్రాగుక్తప్రకారేణానువర్తనే వృథా జీవనమఘసాధనం యస్మాత్ తస్మాజ్జీవతా నియతం కర్మ కర్తవ్యమిత్యర్థః ।
యద్యధికృతేన కర్తవ్యమేవ కర్మ, తర్హి కిమితి అజ్ఞేనేతి విశిష్యతే ? జ్ఞాననిష్టేనాపి తత్ కర్తవ్యమేవాధికృతత్వావిశేషాదిత్యాశ్ఙ్క్య, పూర్వోక్తమనువదతి -
ప్రాగితి ।
నహి జ్ఞానకర్మణోర్విరోధాజ్జ్ఞాననిష్ఠేన కర్మ కర్తుం శక్యతే । తథా చానాత్మజ్ఞేనైవ చిత్తశుద్ధ్యాదిపరమ్పరయా జ్ఞానార్థం కర్మాను్ష్ఠేయమితి ప్రతిపాదితమిత్యర్థః ।
తర్హి ‘యజ్ఞార్థాత్’ (భ. గీ. ౩-౯) ఇత్యాది కిమర్థం, నహి తత్ర జ్ఞాననిష్ఠా ప్రతిపాద్యతే, కర్మనిష్ఠా తు పూర్వమేవోక్తత్వాన్నాత్ర వక్తవ్యేత్యాశఙ్క్య, వృత్తమర్థాన్తరమనువదతి -
ప్రతిపాద్యేతి ।
ప్రాసఙ్గికమ్ - అజ్ఞస్య కర్మకర్తవ్యతోక్తిప్రసఙ్గాదాగతమితి యావత్ । బహుకారణమ్ - ఈశ్వరప్రసాదో దేవతాప్రీతిశ్చేత్యాది । దోషసఙ్కీర్తనం - ‘తైర్దత్తాన్ అప్రదాయ’ (భ. గీ. ౩-౧౨) ఇత్యాది ॥ ౧౬ ॥