యథోక్తే పరస్మిన్నాత్మని సర్వకర్మణాం సమర్పణే కారణమాహ -

అధ్యాత్మేతి ।

వివేకబుద్ధిమేవ వ్యాకరోతి -

అహమితి ।

దర్శితరీత్యా కర్మసు ప్రవృత్తస్య కర్తవ్యాన్తరమాహ -

కిఞ్చేతి ।

త్యక్తాశీః ఫలప్రార్థనాహీనః సన్నిత్యర్థః । నిర్మమోభూత్వా , పుత్రభ్రాత్రాదిష్వితి శేషః ।

నను యుద్ధే నియోగో నోపపద్యతే, పుత్రభ్రాత్రాదిహింసాత్మనస్తస్య సన్తాపహేతోర్నియోగవిషయత్వాయోగాదితి, తత్రాహ -

విగతేతి

॥ ౩౦ ॥