గురుశిష్యపరమ్పరోపన్యాసమేవానుక్రామతి -
ఇమమితి ।
ఇమమిత్యస్య సన్నిహితం విషయం దర్శయతి -
అధ్యాయేతి ।
యోగం - జ్ఞాననిష్ఠాలక్షణం, కర్మయోగోపాయలభ్యమిత్యర్థః ।
స్వయమ్‌ అకృతార్థానాం ప్రయోజనవ్యగ్రాణాం పరార్థప్రవృత్త్యసమ్భవాద్‌ భగవతస్తథావిధప్రవృత్తిదర్శనాత్ కృతార్థతా కల్పనీయేత్యాహ -
వివస్వత ఇతి ।
అవ్యయవేదమూలత్వాదవ్యయత్వం యోగస్య గమయితవ్యమ్ ।
కిమితి భగవతా కృతార్థేనాపి యోగప్రవచనం కృతమితి, తదాహ -
జగదితి ।
కథం యథోక్తేన యోగేన క్షత్రియాణాం బలాధానం ? తదాహ -
తేనేతి ।
యుక్తాః, క్షత్రియా ఇతి శేషః ।
బ్రహ్మశబ్దేన బ్రాహ్మణత్వజాతిరుచ్యతే । యద్యపి యోగప్రవచనేన క్షత్రం రక్షితం, తేన చ బ్రాహ్మణత్వం, తథాఽపి కథం రక్షణీయం జగదశేషం రక్షితమ్ ? ఇత్యాశఙ్క్యాహ -
బ్రహ్మేతి ।
తాభ్యాం హి కర్మఫలభూతం జగద్ అనుష్ఠానద్వారా రక్షితుం శక్యమిత్యర్థః ।
యోగస్యావ్యయత్వే హేత్వన్తరమాహ -
అవ్యయఫలత్వాదితి ।
నను కర్మఫలవత్ ఉక్తయోగఫలస్యాపి సాధ్యత్వేన క్షయిష్ణుత్వమనుమీయతే, నేత్యాహ -
నహీతి ।
అపునరావృత్తిశ్రుతిప్రతిహతమనుమానం న ప్రమాణీభవతీతి భావః ।
భగవతా వివస్వతే ప్రోక్తో యోగస్తత్రైవ పర్యవస్యతి, ఇత్యాశఙ్క్యాహ -
స చేతి ।
స్వపుత్రాయేత్యుభయత్ర సమ్బధ్యతే । ఆదిరాజాయేతి ఇక్ష్వాకోః సూర్యవంశప్రవర్తకత్వేన వైశిష్ట్యముచ్యతే ॥ ౧ ॥