ಪಾರಮಾರ್ಥಿಕಜನ್ಮಾಯೋಗೇ ಕಾರಣಂ ಪೂರ್ವಾರ್ಧೇನಾನೂದ್ಯ, ಪ್ರಾತಿಭಾಸಿಕಜನ್ಮಸಂಭವೇ ಕಾರಣಮಾಹ -
ಪ್ರಕೃತಿಮಿತಿ ।
ಪ್ರಕೃತಿಶಬ್ದಸ್ಯ ಸ್ವರೂಪವಿಷಯತ್ವಂ ಪ್ರತ್ಯಾದೇಷ್ಟುಮ್ ಆತ್ಮಮಾಯಯಾ ಇತ್ಯುಕ್ತಮ್ ।
ವಸ್ತುತೋ ಜನ್ಮಾಭಾವೇ ಕಾರಣಾನುವಾದಭಾಗಂ ವಿವೃಣೋತಿ -
ಅಜೋಽಪೀತ್ಯಾದಿನಾ ।
ಪ್ರಾತಿಭಾಸಿಕಜನ್ಮಸಂಭವೇ ಕಾರಣಕಥನಪರಮುತ್ತರಾರ್ಧಂ ವಿಭಜತೇ -
ಪ್ರಕೃತಿಮಿತ್ಯಾದಿನಾ ।
ಪ್ರಕೃತಿಶಬ್ದಸ್ಯ ಸ್ವರೂಪಶಬ್ದಪರ್ಯಾಯತ್ವಂ ವಾರಯತಿ -
ಮಾಯಾಮಿತಿ ।
ತಸ್ಯಾಃ ಸ್ವಾತಂತ್ರ್ಯಂ ನಿರಾಕೃತ್ಯ ಭಗವದಧೀನತ್ವಮಾಹ -
ಮಮೇತಿ ।
ತಸ್ಯಾಶ್ಚಾಧಿಕರಣದ್ವಾರೇಣಾವಚ್ಛಿನ್ನತ್ವಂ ಸೂಚಯತಿ -
ವೈಷ್ಣವೀಮಿತಿ ।
ಮಾಯಾಶಬ್ದಸ್ಯಾಪಿ ಪ್ರಜ್ಞಾನಾಮಸು ಪಾಠಾದ್ ವಿಜ್ಞಾನಶಕ್ತಿವಿಷಯತ್ವಮಾಶಂಕ್ಯಾಹ -
ತ್ರಿಗುಣಾತ್ಮಿಕಾಮಿತಿ ।
ತಸ್ಯಾಃ ಕಾರ್ಯಲಿಂಗಕಮನುಮಾನಂ ಸೂಚಯತಿ -
ಯಸ್ಯಾ ಇತಿ ।
ಜಗತೋ ಮಾಯಾವಶವರ್ತಿತ್ವಮೇವ ಸ್ಫುಟಯತಿ -
ಯಯೇತಿ ।
ಯಥಾ ಲೋಕೇ ಕಶ್ಚಿಜ್ಜಾತೋ ದೇಹವಾನಾಲಕ್ಷ್ಯತೇ, ಏವಮಹಮಪಿ ಮಾಯಾಮಾಶ್ರಿತ್ಯತ್ಯಾ ಸ್ವವಶಯಾ ಸಂಭವಾಮಿ - ಜನ್ಮವ್ಯವಹಾರಮನುಭವಾಮಿ, ತೇನ ಮಾಯಾಮಯಮೀಶ್ವರಸ್ಯ ಜನ್ಮೇತ್ಯಾಹ -
ತಾಂ ಪ್ರಕೃತಿಮಿತ್ಯಾದಿನಾ ।
ಸಂಭವಾಮೀತ್ಯುಕ್ತಮೇವ ವಿಭಜತೇ -
ದೇಹವಾನಿತಿ ।
ಅಸ್ಮದಾದೇರಿವ ತವಾಪಿ ಪರಮಾರ್ಥತ್ವಾಭಿಮಾನೋ ಜನ್ಮಾದಿವಿಷಯೇ ಸ್ಯಾದಿತ್ಯಾಶಂಕ್ಯ, ಪ್ರಾಗುಕ್ತಸ್ವರೂಪಪರಿಜ್ಞಾನವತ್ತ್ವಾದೀಶ್ವರಸ್ಯ ಮೈವಮಿತ್ಯಾಹ –
ನ ಪರಮಾರ್ಥತ ಇತಿ ।
ಆವೃತಜ್ಞಾನವತೋ ಲೋಕಸ್ಯ ಜನ್ಮಾದಿವಿಷಯೇ ಪರಮಾರ್ಥತ್ವಾಭಿಮಾನಃ ಸಂಭವತೀತ್ಯಾಹ -
ಲೋಕವದಿತಿ
॥ ೬ ॥