ಯಥೋಕ್ತಾನಾಂ ಯಜ್ಞಾನಾಂ ಮಧ್ಯೇ ಕೇನಚಿದಪಿ ಯಜ್ಞೇನ ಅವಿಶೇಷಿತಸ್ಯ ಪುರುಷಸ್ಯ ಪ್ರತ್ಯವಾಯಂ ದರ್ಶಯತಿ -
ನಾಯಮಿತಿ ।
ಕಥಂ ಯಥೋಕ್ತಯಜ್ಞಾನುಷ್ಠಾಯಿನಾಮ್ ಅವಶಿಷ್ಟೇನ ಕಾಲೇನ ವಿಹಿತಾನ್ನಭುಜಾಂ ಬ್ರಹ್ಮಪ್ರಾಪ್ತಿಃ ? ಇತ್ಯಾಶಂಕ್ಯ, ಮುಮುಕ್ಷುತ್ವೇ ಸತಿ ಚಿತ್ತಶುದ್ಧಿದ್ವಾರಾ, ಇತ್ಯಾಹ - ಮುಮುಕ್ಷವಶ್ಚೇದಿತಿ । ತತ್ಕಿಮಿದಾನೀಂ ಸಾಕ್ಷಾದೇವ ಮೋಕ್ಷೋ ವಿವಿಕ್ಷಿತಃ ? ತಥಾಚ ಗತಿಶ್ರುತಿವಿರೋಧಃ ಸ್ಯಾದ್ , ಇತ್ಯಾಶಂಕ್ಯ, ಗತಿನಿರ್ದೇಶಸಾಮರ್ಥ್ಯಾತ್ ಕ್ರಮಮುಕ್ತಿಃ ಅತ್ರಾಭಿಪ್ರೇತಾ, ಇತ್ಯಾಹ -
ಕಾಲಾತೀತಿ ।
ತೃತೀಯಂ ಪಾದಂ ವ್ಯಾಚಷ್ಟೇ -
ನಾಯಮಿತಿ ।
ವಿವಕ್ಷಿತಂ ಕೈಮುತಿಕನ್ಯಾಯಮಾಹ - ಕುತ ಇತಿ । ಸಾಧಾರಣಲೋಕಾಭಾವೇ ಪುನರಸಾಧಾರಣಲೋಕಪ್ರಾಪ್ತಿಃ ದೂರನಿರಸ್ತಾ ಇತ್ಯರ್ಥಃ । ಯಥೋಕ್ತೇಽರ್ಥೇ ಬುದ್ಧಿಸಮಾಧಾನಂ ಕುರುಕುಲಪ್ರಧಾನಸ್ಯ ಅರ್ಜುನಸ್ಯ ಅನಾಯಾಸಲಭ್ಯಮಿತಿ ವಕ್ತುಂ ಕುರುಸತ್ತಮ ಇತ್ಯುಕ್ತಮ್ ॥ ೩೧ ॥