ಶ್ರೀಮದ್ಭಗವದ್ಗೀತಾಭಾಷ್ಯಮ್
ಪಂಚಮೋಽಧ್ಯಾಯಃ
ಪೂರ್ವಪೃಷ್ಠಮ್      ಉತ್ತರಪೃಷ್ಠಮ್
ಆನಂದಗಿರಿಟೀಕಾ (ಗೀತಾಭಾಷ್ಯ)
 
ಭೋಕ್ತಾರಂ ಯಜ್ಞತಪಸಾಂ ಸರ್ವಲೋಕಮಹೇಶ್ವರಮ್ ।
ಸುಹೃದಂ ಸರ್ವಭೂತಾನಾಂ ಜ್ಞಾತ್ವಾ ಮಾಂ ಶಾಂತಿಮೃಚ್ಛತಿ ॥ ೨೯ ॥
ಭೋಕ್ತಾರಂ ಯಜ್ಞತಪಸಾಂ ಯಜ್ಞಾನಾಂ ತಪಸಾಂ ಚ ಕರ್ತೃರೂಪೇಣ ದೇವತಾರೂಪೇಣ ಚ, ಸರ್ವಲೋಕಮಹೇಶ್ವರಂ ಸರ್ವೇಷಾಂ ಲೋಕಾನಾಂ ಮಹಾಂತಮ್ ಈಶ್ವರಂ ಸುಹೃದಂ ಸರ್ವಭೂತಾನಾಂ ಸರ್ವಪ್ರಾಣಿನಾಂ ಪ್ರತ್ಯುಪಕಾರನಿರಪೇಕ್ಷತಯಾ ಉಪಕಾರಿಣಂ ಸರ್ವಭೂತಾನಾಂ ಹೃದಯೇಶಯಂ ಸರ್ವಕರ್ಮಫಲಾಧ್ಯಕ್ಷಂ ಸರ್ವಪ್ರತ್ಯಯಸಾಕ್ಷಿಣಂ ಮಾಂ ನಾರಾಯಣಂ ಜ್ಞಾತ್ವಾ ಶಾಂತಿಂ ಸರ್ವಸಂಸಾರೋಪರತಿಮ್ ಋಚ್ಛತಿ ಪ್ರಾಪ್ನೋತಿ ॥ ೨೯ ॥
ಭೋಕ್ತಾರಂ ಯಜ್ಞತಪಸಾಂ ಸರ್ವಲೋಕಮಹೇಶ್ವರಮ್ ।
ಸುಹೃದಂ ಸರ್ವಭೂತಾನಾಂ ಜ್ಞಾತ್ವಾ ಮಾಂ ಶಾಂತಿಮೃಚ್ಛತಿ ॥ ೨೯ ॥
ಭೋಕ್ತಾರಂ ಯಜ್ಞತಪಸಾಂ ಯಜ್ಞಾನಾಂ ತಪಸಾಂ ಚ ಕರ್ತೃರೂಪೇಣ ದೇವತಾರೂಪೇಣ ಚ, ಸರ್ವಲೋಕಮಹೇಶ್ವರಂ ಸರ್ವೇಷಾಂ ಲೋಕಾನಾಂ ಮಹಾಂತಮ್ ಈಶ್ವರಂ ಸುಹೃದಂ ಸರ್ವಭೂತಾನಾಂ ಸರ್ವಪ್ರಾಣಿನಾಂ ಪ್ರತ್ಯುಪಕಾರನಿರಪೇಕ್ಷತಯಾ ಉಪಕಾರಿಣಂ ಸರ್ವಭೂತಾನಾಂ ಹೃದಯೇಶಯಂ ಸರ್ವಕರ್ಮಫಲಾಧ್ಯಕ್ಷಂ ಸರ್ವಪ್ರತ್ಯಯಸಾಕ್ಷಿಣಂ ಮಾಂ ನಾರಾಯಣಂ ಜ್ಞಾತ್ವಾ ಶಾಂತಿಂ ಸರ್ವಸಂಸಾರೋಪರತಿಮ್ ಋಚ್ಛತಿ ಪ್ರಾಪ್ನೋತಿ ॥ ೨೯ ॥

ಪ್ರಸಿದ್ಧಂ ಭೋಕ್ತಾರಂ ವ್ಯವಚ್ಛಿನತ್ತಿ -

ಸರ್ವಲೋಕೇತಿ ।

‘ತತೋ ಹ್ಯಸ್ಯ ಬಂಧವಿಪರ್ಯಯೌ’ (ಬ್ರ. ಸೂ. ೩-೨-೫) ಇತಿ ನ್ಯಾಯೇನ ಸರ್ವಫಲದಾತೃತ್ವಂ ದರ್ಶಯತಿ -

ಸುಹೃದಮಿತಿ ।

ಉಕ್ತೇಶ್ವರಜ್ಞಾನೇ ಫಲಂ ಕಥಯತಿ -

ಜ್ಞಾತ್ವೇತಿ ।

ಯಜ್ಞೇಷು ತಪಸ್ಸು ಚ ದ್ವಿಧಾ ಭೋಕ್ತೃತ್ವಂ ವ್ಯನಕ್ತಿ -

ಕರ್ತೃರೂಪೇಣೇತಿ ।

ಹಿರಣ್ಯಗರ್ಭಾದಿವ್ಯವಚ್ಛೇದಾರ್ಥಂ ವಿಶಿನಷ್ಟಿ -

ಮಹಾಂತಮಿತಿ ।

ಸ್ವಪರಿಕರೋಪಕಾರಿಣಂ ರಾಜಾನಂ ವ್ಯಾವರ್ತಯತಿ -

ಪ್ರತ್ಯುಪಕಾರೇತಿ ।

ಈಶ್ವರಸ್ಯ ತಾಟಸ್ಥ್ಯಂ ವ್ಯುದಸ್ಯತಿ -

ಸರ್ವಭೂತಾನಾಮಿತಿ ।

ತರ್ಹಿ ತತ್ರ ತತ್ರ ವ್ಯವಸ್ಥಿತಕರ್ಮತತ್ಫಲಸಂಸರ್ಗಿತ್ವಂ ಸ್ಯಾತ್ , ಇತ್ಯಾಶಂಕ್ಯ, ಆಹ -

ಸರ್ವಕರ್ಮೇತಿ ।

ನ ಚ ತಸ್ಯ ಬುದ್ಧಿತದ್ವೃತ್ತಿಸಂಬಂಧೋಽಪಿ ವಸ್ತುತೋಽಸ್ತಿ, ಇತ್ಯಾಹ -

ಸರ್ವಪ್ರತ್ಯಯೇತಿ ।

ಯಥೋಕ್ತೇಶ್ವರಪರಿಜ್ಞಾನಫಲಮ್ ಆಭಿದಧಾತಿ -

ಮಾಂ ನಾರಾಯಣಮಿತಿ ।

ತದೇವಂ ಕರ್ಮಯೋಗಸ್ಯ ಅಮುಖ್ಯ ಸನ್ಯಾಸಾಪೇಕ್ಷಯಾ ಪ್ರಶಸ್ತತ್ವೇಽಪಿ ತತೋ ಮುಖ್ಯಸಂನ್ಯಾಸಸ್ಯ ಆಧಿಕ್ಯಾತ್ ತದ್ವತೋ ಬುದ್ಧಿಶುದ್ಧ್ಯಾದಿಯುಕ್ತಸ್ಯ ಕಾಮಕ್ರೋಧೋದ್ಭವಂ ವೇಗಮ್  ಇಹೈವ ಸೋಢುಂ ಶಕ್ತಸ್ಯ ಶಮದಮಾದಿಮತೋ ಯೋಗಾಧಿಕೃತಸ್ಯ ತ್ವಂಪದಾರ್ಥಾಭಿಜ್ಞಸ್ಯ ಪರಮಾತ್ಮಾನಂ ಪ್ರತ್ಯಕ್ತ್ವೇನ ಜಾನತೋ ಮುಕ್ತಿಃ ಇತಿ ಸಿದ್ಧಮ್ ॥ ೨೯ ॥

ಇತಿ ಆನಂದಗಿರಿಕೃತಟೀಕಾಯಾಂ ಪಂಚಮೋಽಧ್ಯಾಯಃ ॥ ೫ ॥