ಧ್ಯಾನಯೋಗಪ್ರಸ್ತಾವಾನಂತರಂ ತದ್ಯೋಗ್ಯತಾಹೇತುಕರ್ಮಣಃ ಸ್ತುತಿಂ ಭಗವಾನ್ ಉಕ್ತವಾನ್ , ಇತ್ಯಾಹ -
ಶ್ರೀಭಗವಾನಿತಿ ।
ಪೂರ್ವೋತ್ತರಾಧ್ಯಾಯಯೋಃ ಸಂಗತಿಮ್ ಅಭಿದಧಾನೋ ವೃತ್ತಮ್ ಅನೂದ್ಯ, ಅಧ್ಯಾಯಾಂತರಮ್ ಅವತಾರಯತಿ -
ಅತೀತೇತಿ ।
ಸಮ್ಯಗ್ದರ್ಶನಪ್ರಕರಣೇ ಧ್ಯಾನಯೋಗಸ್ಯ ಪ್ರಸಂಗಾಭಾವಂ ವ್ಯುದಸ್ಯತಿ -
ಸಮ್ಯಗಿತಿ ।
ಸಂಗ್ರಹವಿವರಣಯೋಃ ಅತೀತಾನಂತರಾಧ್ಯಾಯಯೋಃ ಯುಕ್ತಂ ಹೇತುಹೇತುಮತ್ತ್ವಮ್ , ಇತಿ ಭಾವಃ ।
ಅಧ್ಯಾಯಸಂಬಂಧಮ್ ಅಭಿಧಾಯ ‘ಅನಾಶ್ರಿತಃ ಕರ್ಮಫಲಮ್ ‘ ಇತ್ಯಾದಿಶ್ಲೋಕದ್ವಯಸ್ಯ ತಾತ್ಪರ್ಯಮ್ ಆಹ -
ತತ್ರೇತಿ ।
ಕರ್ಮಯೋಗಸ್ಯ ಸಂನ್ಯಾಸಹೇತೋಃ ಮರ್ಯಾದಾಂ ದರ್ಶಯಿತುಮ್ , ಸಾಂಗಂ ಚ ಯೋಗಂ ವಿಚಾರಯಿತುಮ್ ಅಧ್ಯಾಯೇ ಪ್ರವೃತ್ತೇ ಸತಿ, ಇತಿ ಸಪ್ತಮ್ಯರ್ಥಃ । ಸಂನ್ಯಾಸಿನಾ ಕರ್ತವ್ಯಂ ಕರ್ಮ, ಇತ್ಯೇವಂ ಪ್ರತಿಭಾಸಂ ವ್ಯುದಸ್ಯತಿ -
ಗೃಹಸ್ಥೇನೇತಿ ।
ಕರ್ತವ್ಯತ್ವಂ ಸ್ತುತಿಯೋಗ್ಯತ್ವಮ್ ಅತಶ್ಶಬ್ದಾರ್ಥಃ ।