ತತ್ರ ಹೇತುಮ್ ಆಹ -
ಆತ್ಮೈವ ಹೀತಿ ।
ಉದ್ಧರಣಾಪೇಕ್ಷಾಮ್ ಆತ್ಮನಃ ಸೂಚಯತಿ -
ಸಂಸಾರೇತಿ ।
ಸಂಸಾರಾತ್ ಊರ್ಧ್ವಂ ಹರಣ ಕೀದೃಕ್ ? ಇತ್ಯಾಶಂಕ್ಯ, ಆಹ -
ಯೋಗಾರೂಢತಾಮಿತಿ ।
ಯೋಗಪ್ರಾಪ್ತೌ ಅನಾಸ್ಥಾ ತು ನ ಕರ್ತವ್ಯಾ, ಇತ್ಯಾಹ -
ನಾತ್ಮಾನಮಿತಿ ।
ಯೋಗಪ್ರಾಪ್ತ್ಯುಪಾಯಶ್ಚೇತ್ ನಾನುಷ್ಠೀಯತೇ, ತದಾ ಯೋಗಾಭಾವೇ ಸಮ್ಸಾರಪರಿಹಾರಾಸಂಭವಾತ್ ಆತ್ಮಾ ಅಧೋ ನೀತಃ ಸ್ಯಾತ್ , ಇತ್ಯರ್ಥಃ ।
ನನು - ಆತ್ಮಾನಂ ಸಮ್ಸಾರೇ ನಿಮಗ್ನಂ ತದೀಯೋ ಬಂಧುಃ ತಸ್ಮಾತ್ ಉದ್ಧರಿಷ್ಯತಿ ; ನೇತ್ಯಾಹ -
ಆತ್ಮೈವ ಹೀತಿ ।
ಕುತೋಽವಧಾರಣಮ್ ಅನ್ಯಸ್ಯಾಪಿ ಪ್ರಸಿದ್ಧಸ್ಯ ಬಂಧೋಃ ಸಂಭವಾತ್ , ತತ್ರ ಆಹ -
ನ ಹೀತಿ ।
ಅನ್ಯೋ ಬಂಧುಃ ಸನ್ ಅಪಿ ಸಮ್ಸಾರಮುಕ್ತಯೇ ನ ಭವತಿ, ಇತ್ಯೇತತ್ ಉಪಪಾದಯತಿ -
ಬಂಧುರಪೀತಿ ।
‘ಸ್ನೇಹಾದಿ’ ಇತಿ ಆದಿಶಬ್ದಾತ್ ತದನುಗುಣಪ್ರವೃತ್ತಿವಿಷಯತ್ವಂ ಗೃಹ್ಯತೇ ।
ಆತ್ಮಾತಿರಿಕ್ತಿಸ್ಯಾಪಿ ಶತ್ರೋಃ ಅಪಕಾರಿಣಃ ಸುಪ್ರಸಿದ್ಧತ್ವಾತ್ ಅವಧಾರಣಮ್ ಅನುಚಿತಮ್ , ಇತ್ಯಾಶಂಕ್ಯ, ಆಹ -
ಯೋಽನ್ಯ ಇತಿ
॥ ೫ ॥