శ్రోత్రాదీనాం కుత్ర ద్వారత్వమ్ ? తత్ర ఆహ -
ఉపలబ్ధావితి ।
తేషాం సంయమనమ్ - విషయేషు ప్రవృత్తానాం దోషదర్శనద్వారా తేభ్యో వైముఖ్యాపాదనమ్ ।
కోఽయం మనసో హృదయే నిరోధః ? తత్ర ఆహ -
నిష్ప్రచారమితి ।
మనసో విషయాకారవృత్తిం నిరుధ్య హృది వశీకృతస్య కాయం దర్శయతి -
తత్రేతి ।
‘ఊర్ధ్వమ్ ‘ ఇత్యత్రాపి హృదయాత్ ఇతి సమ్బధ్యతే । సర్వాణి ఉపలబ్ధిద్వారాణి శ్రోత్రాదీని సన్నిరుధ్య, వాయుమపి సర్వతో నిగృహ్య హృదయమ్ ఆనీయ,తతో నిర్గతయా సుషుమ్నయా కణ్ఠభ్రూమధ్యలలాటక్రమేణ ప్రాణం మూర్ధని ఆధాయ యోగధారణామ్ ఆరూఢోబ్రహ్మ వ్యాహరన్ , మాం చ తదర్థమ్ అనుస్మరన్ , పరమాం గతిం యాతి, ఇతి సమ్బన్ధః
॥ ౧౨ ॥