ಸೃಷ್ಟಿಸ್ಥಿತಿಸಂಹಾರಾಣಾಂ ಅಸಂಗಾತ್ಮಾಧಾರತ್ವಂ ‘ಮಯಾ ತತಮಿದಮ್‘ (ಭ. ಗೀ. ೯-೪) ಇತ್ಯಾದಿ ಶ್ಲೋಕದ್ವಯೇನ ಉಕ್ತೋಽರ್ಥಃ । ತಂ ದೃಷ್ಟಾಂತೇನ ಉಪಪಾದಯನ್ ಆದೌ ದೃಷ್ಟಾಂತಮಾಹ, ಇತಿ ಯೋಜನಾ । ‘ಸದಾ’ ಇತಿ ಉತ್ಪತ್ತಿಸ್ಥಿತಿಸಂಹಾರಕಾಲೋ ಗೃಹ್ಯತೇ । ಆಕಾಶಾದೇಃ ಮಹತೋಽನ್ಯಾಧಾರತ್ವಂ ಕಥಮ್ ? ಇತ್ಯಾಶಂಕ್ಯ, ಆಹ -

ಮಹಾನಿತಿ ।

ಯಥಾ ಸರ್ವಗಾಮಿತ್ವಾತ್  ಪರಿಮಾಣತೋ ಮಹಾನ್ ವಾಯುಃ ಆಕಾಶೇ ಸದಾ ತಿಷ್ಠತಿ, ತಥಾ ಆಕಾಶಾದೀನಿ ಮಹಾಂತ್ಯಪಿ ಸರ್ವಾಣಿ ಭೂತಾನಿ ಆಕಾಶಕಲ್ಪೇ ಪೂರ್ಣೇ ಪ್ರತೀಚಿ ಅಸಂಗೇ ಪರಸ್ಮಿನ್ ಆತ್ಮನಿ ಸಂಶ್ಲೇಷಮಂತರೇಣ ಸ್ಥಿತಾನಿ, ಇತ್ಯರ್ಥಃ

॥ ೬ ॥