గమ్యత ఇతి ప్రకృతివిలయాన్తం కర్మఫలం గతిః ఇత్యాహ -
కర్మేతి ।
పోష్టా - కర్మఫలస్య ప్రదాతా ।
కార్యకారణప్రపఞ్చస్య అధిష్ఠానమ్ ఇత్యాహ -
నివాస ఇతి ।
శీర్యతే దుఃఖమ్ అస్మిన్ ఇతి వ్యుత్పత్తిమ్ ఆశ్రిత్య ఆహ -
శరణమితి ।
ప్రభవతి అస్మాత్ జగత్ ఇతి వ్యుత్పత్తిమ్ ఆదాయ ఉక్తమ్ -
ఉత్పత్తిరితి ।
కారణస్య కథమ్ అవ్యయత్వమ్ ? ఇత్యాశఙ్క్య ఆహ -
యావదితి ।
కారణమ్ అన్తరేణాపి కార్యం కదాచిత్ ఉదేష్యతి, కిం కారణేన ? ఇత్యాశఙ్క్య ఆహ -
న హీతి ।
మాభూత్ తర్హి సంసారదశాయామేవ కదాచిత్ కార్యోత్పత్తిః ఇత్యాశఙ్క్య ఆహ -
నిత్యం చేతి ।
కారణవ్యక్తేః నాశమ్ అఙ్గీకృత్య తదన్యతమవ్యక్తిశూన్యత్వం పూర్వకాలస్య నాస్తీతి సిద్ధవత్కృత్య విశినష్టి -
బీజేతి
॥ ౧౮ ॥