ಯೇಭ್ಯಃ ಅನ್ಯೋ ನ ವಿದ್ಯತೇ ಇತಿ ವ್ಯುತ್ಪತ್ತಿಮ್ ಆಶ್ರಿತ್ಯ ಆಹ -
ಅಪೃಥಗಿತಿ ।
ಕಾರ್ಯಸ್ಯ ಇವ ಕಾರಣೇ ತಾದಾತ್ಮ್ಯಂ ವ್ಯಾವರ್ತಯತಿ -
ಪರಮಿತಿ ।
ಅಹಮೇವ ವಾಸುದೇವಃ ಸರ್ವಾತ್ಮಾ, ನ ಮತ್ತಃ ಅನ್ಯತ್ಕಿಂಚಿತ್ ಅಸ್ತಿ ಇತಿ ಜ್ಞಾತ್ವಾ, ತಮೇವ ಪ್ರತ್ಯಂಚಂ ಸದಾ ಧ್ಯಾಯಂತೇ ಇತ್ಯಾಹ -
ಚಿಂತಯಂತ ಇತಿ ।
ಪ್ರಾಕೃತಾನ್ ವ್ಯಾವರ್ತ್ಯ ಮುಖ್ಯಾನ್ ಅಧಿಕಾರಿಣಃ ನಿರ್ದಿಶತಿ -
ಸಂನ್ಯಾಸಿನ ಇತಿ ।
ಪರ್ಯುಪಾಸತೇ - ಪರಿತಃ - ಸರ್ವತಃ ಅನವಚ್ಛಿನ್ನತಯಾ ಪಶ್ಯಂತಿ, ಇತ್ಯರ್ಥಃ ।
ನಿತ್ಯಾಭಿಯುಕ್ತಾನಾಮ್ - ನಿತ್ಯಮ್ - ಅನವರತಮ್ ಆದರೇಣ ಧ್ಯಾನೇ ವ್ಯಾಪೃತಾನಾಮ್ ಇತ್ಯಾಹ -
ಸತತೇತಿ ।
ಯೋಗಶ್ಚ ಕ್ಷೇಮಶ್ಚ ಯೋಗಕ್ಷೇಮಮ್ । ತತ್ರ ಅಪುನರುಕ್ತಮ್ ಅರ್ಥಮ್ ಆಹ -
ಯೋಗ ಇತಿ ।
ಕಿಮರ್ಥಂ ಪರಮಾರ್ಥದರ್ಶಿನಾಂ ಯೋಗಕ್ಷೇಮಂ ವಹಸಿ ? ಇತ್ಯಾಶಂಕ್ಯ, ಆಹ -
ಜ್ಞಾನೀ ತ್ವಿತಿ ।
ಅತಃ ತೇಷಾಂ ಯೋಗಕ್ಷೇಮಂ ವಹಾಮಿ, ಇತಿ ಸಂಬಂಧಃ ।