ಯದಿ ಅನ್ಯದೇವತಾಭಕ್ತಾಃ ಭಗವತ್ತತ್ವಾಜ್ಞಾನಾತ್ ಕರ್ಮಫಲಾತ್ ಚ್ಯವಂತೇ, ತರ್ಹಿ ತೇಷಾಂ ದೇವತಾಂತರ ಯಜನಮ್ ಅಕಿಂಚಿತ್ಕರಮ್ ಇತ್ಯಾಶಂಕ್ಯ, ಆಹ -

ಯೇಽಪೀತಿ ।

ದೇವತಾಂತರಯಾಜಿನಾಮ್ ಅನಾವೃತ್ತಿಫಲಾಭಾವೇಽಪಿ ತತ್ತದ್ದೇವತಾಯಾಗಾನುರೂಪಫಲಪ್ರಾಪ್ತಿ ಧ್ರೌವ್ಯಾತ್ ನ ತತ್ ಅಕಿಂಚಿತ್ಕರಮ್ , ಇತ್ಯರ್ಥಃ ।

ದೇವತಾಂತರಯಾಜಿನಾಮ್ ಆವಶ್ಯಕಂ ತತ್ಫಲಮ್ ಆಶಂಕಾಪೂರ್ವಕಮ್ ಉದಾಹರತಿ -

ಕಥಮಿತ್ಯಾದಿನಾ ।

ನಿಯಮಃ - ಬಲ್ಯುಪಹಾರಪ್ರದಕ್ಷಿಣಪ್ರಹ್ವೀಭಾವಾದಿಃ, ಇತ್ಯರ್ಥಃ ।