ಸೋಪಾಧಿಕಂ ಪ್ರಭಾವಂ ಭಗವತೋ ದರ್ಶಯಿತ್ವಾ ತಜ್ಜ್ಞಾನಫಲಮ್ ಆಹ -
ಏತಾಮಿತಿ ।
ಬುದ್ಧ್ಯಾದ್ಯುಪಾದಾನತ್ವೇನ ವಿವಿಧಾ ಭೂತಿಃ - ಭವನಮ್ ವೈಭವಮ್ ಸರ್ವಾತ್ಮಕತ್ವಮ್ , ತದಾಹ -
ವಿಸ್ತಾರಮಿತಿ ।
ಈಶ್ವರಸ್ಯ ತತ್ತದರ್ಥಸಂಪಾದನಸಾಮರ್ಥ್ಯಂ ಯೋಗಃ, ತದಾಹ -
ಆತ್ಮನ ಇತಿ ।
ಯೋಗಃ - ತತ್ಫಲಮ್ ಐಶ್ವರ್ಯಂ ಸರ್ವಜ್ಞತ್ವಂ ಸರ್ವೇಶ್ವರತ್ವಂ ಚ ಮದೀಯಂ ಶಕ್ತಿಜ್ಞಾನಲೇಶಮ್ ಆಶ್ರಿತ್ಯ ಮನ್ವಾದಯೋ ಭೃಗ್ವಾದಯಶ್ಚ ಈಶತೇ ಜಾನತೇ ಚ ತದಾಹ -
ಅಥವೇತಿ ।
ಯಥಾ ತೌ ವಿಭೂತಿಯೋಗೌ ತಥಾ ವೇದನಸ್ಯ ನಿರಂಕುಶತ್ವಂ ದರ್ಶಯತಿ -
ಯಥಾವದಿತಿ ।
ಸೋಪಾಧಿಕಂ ಜ್ಞಾನಂ ನಿರೂಪಾಧಿಕಜ್ಞಾನೇ ದ್ವಾರಮ್ , ಇತ್ಯಾಹ -
ಸೋಽವಿಕಂಪೇನೇತಿ ।
ಉಕ್ತೇ ಅರ್ಥೇ ಪ್ರತಿಬಂಧಾಭಾವಮ್ ಆಹ -
ನಾಸ್ಮಿನ್ ಇತಿ
॥ ೭ ॥