ಪ್ರಭವತಿ ಅಸ್ಮಾತ್ , ಇತಿ ಪ್ರಭವಃ ಸರ್ವಪ್ರಕೃತಿಃ ಸರ್ವಾತ್ಮಾ, ಇತ್ಯಾಹ -

ಉತ್ಪತ್ತಿರಿತಿ ।

ಸರ್ವಜ್ಞಾತ್ ಸರ್ವೇಶ್ವರಾತ್ ಮತ್ತೋ ನಿಮಿತ್ತಾತ್ , ಸರ್ವಮ್ - ಸ್ಥಿತಿನಾಶಾದಿ ಭವತಿ ।

ಮಯಾ ಚ ಅಂತರ್ಯಾಮಿನಾ ಪ್ರೇರ್ಯಮಾಣಂ ಸರ್ವಂ ಯಥಾಸ್ವಂ ಮರ್ಯಾದಾಮ್ ಅನತಿಕ್ರಮ್ಯ ಚೇಷ್ಟತೇ । ತದಾಹ -

ಮತ್ತ ಇತಿ ।

ಇತ್ಥಂ ಮಮ ಸರ್ವಾತ್ಮತ್ವಂ ಸರ್ವಪ್ರಕೃತಿತ್ವಂ ಸರ್ವೇಶ್ವರತ್ವಂ ಸರ್ವಜ್ಞತ್ವಂ ಚ ಮಹಿಮಾನಂ ಜ್ಞಾತ್ವಾ ಮಯ್ಯೇವ ನಿಷ್ಠಾವಂತೋ ಭವಂತಿ, ಇತ್ಯಾಹ -

ಇತ್ಯೇವಮಿತಿ ।

ಸಂಸಾರಾಸಾರತಾಜ್ಞಾನವತಾಂ ಭಗವದ್ಭಜನೇ ಅಧಿಕಾರಂ ದ್ಯೋತಯತಿ -

ಅವಗತೇತಿ ।

ಪರಮಾರ್ಥತತ್ತ್ವೇ ಪೂರ್ವೋಕ್ತರೀತ್ಯಾ ಜ್ಞಾತೇ ಪ್ರೇಮಾದರೌ ಅಭಿನಿವೇಶಾಖ್ಯೌ ಭವತಃ ।

ತೇನ ಸಂಯುಕ್ತತ್ವಂ ಚ ಭಗವದ್ಭಜನೇ ಭವತಿ ಹೇತುಃ, ಇತ್ಯಾಹ -

ಭಾವೇತಿ

॥ ೮ ॥