ಮತ್ಕರ್ಮಕೃದಿತ್ಯುಕ್ತೇ, ಮತ್ಪರಮತ್ವಮ್ ಆರ್ಥಿಕಮಿತಿ ಪುನರುಕ್ತಿಃ, ಇತ್ಯಾಶಂಕ್ಯ ಆಹ-
ಕರೋತೀತಿ ।
ಭಗವಾನೇವ ಪರಮಾ ಗತಿಃ ಇತಿ ನಿಶ್ಚಯವತಃ ತತ್ರೈವ ನಿಷ್ಠಾ ಸಿಧ್ಯತಿ, ಇತ್ಯಾಹ-
ತಥೇತಿ ।
ನ ತತ್ರೈವ ಸರ್ವಪ್ರಕಾರೈಃ ಭಜನಮ್ , ಧನಾದಿಸ್ನೇಹಾಕೃಷ್ಟತ್ವಾತ್ , ಇತ್ಯಾಶಂಕ್ಯ ಆಹ-
ಸಂಗೇತಿ ।
ದ್ವೇಷಪೂರ್ವಕಾನಿಷ್ಟಾಚರಣಂ ವೈರಮ್ , ಅನಪಕಾರಿಷು ತದಭಾವೇಽಪಿ ಭವತ್ಯೇವ ಅಪಕಾರಿಷು ಇತಿ ಶಂಕಿತ್ವಾ ಆಹ-
ಆತ್ಮನ ಇತಿ ।
ಏತಚ್ಚ ಸರ್ವಂ ಸಂಕ್ಷಿಪ್ಯ ಅನುಷ್ಠಾನಾರ್ಥಮ್ ಉಕ್ತಮ್ । ಏವಮ್ ಅನುತಿಷ್ಠತೋ ಭಗವತ್ಪ್ರಾಪ್ತಿಃ ಅವಶ್ಯಂ ಭಾವಿನೀ, ಇತ್ಯುಪಸಂಹರತಿ-
ಅಯಮಿತಿ ।
ತದೇವಂ ಭಗವತೋ ವಿಶ್ವರೂಪಸ್ಯ ಸರ್ವಾತ್ಮನಃ ಸರ್ವಜ್ಞಸ್ಯ ಸರ್ವೇಶ್ವರಸ್ಯ ಮತ್ಕರ್ಮಕೃದಿತ್ಯಾದಿನ್ಯಾಯೇನ ಕ್ರಮಮುಕ್ತಿಫಲಮ್ ಅಭಿಧ್ಯಾನಮ್ ಅಭಿವದತಾ ತತ್ಪದವಾಚ್ಯೋಽರ್ಥೋ ವ್ಯವಸ್ಥಾಪಿತಃ
॥ ೫೫ ॥
ಇತಿ ಶ್ರೀಮತ್ಪರಮಹಂಸ - ಪರಿವ್ರಜಕಾಚಾರ್ಯ - ಶ್ರೀಮಚ್ಛುದ್ಧಾನಂದಪೂಜ್ಯಪಾದಶಿಷ್ಯಾನಂದಜ್ಞಾನ - ವಿರಚಿತೇ ಶ್ರೀಮದ್ಭಗವದ್ಗೀತಾಶಾಂಕರಭಾಷ್ಯವ್ಯಾಖ್ಯಾನೇ ಏಕಾದಶೋಽಧ್ಯಾಯಃ ॥ ೧೧ ॥