ಕಥಮ್ ಅಕ್ಷರಮ್ ಉಪಾಸತೇ? ತದುಪಾಸನೇ ವಾ ಕಿಂ ಸ್ಯಾತ್ ? ಇತಿ ತದಾಹ -

ಸನ್ನಿಯಮ್ಯೇತಿ ।

ತುಲ್ಯಾ ಹರ್ಷವಿಷಾದರಾಗದ್ಧೇಷಾದಿರಹಿತಾ ಸಮ್ಯಗ್ಜ್ಞಾನೇನ ಅಜ್ಞಾನಸ್ಯ ಅಪನೀತತ್ವಾತ್ ।

ಕ್ರಮಪರಂಪರಾಪೇಕ್ಷಯೋಃ ಅಸಂಭವಂ ವಿವಕ್ಷಿತ್ವಾ, ಆಹ -

ತೇ ಯ ಇತಿ ।

ಸರ್ವೇಭ್ಯೋ ಭೂತೇಭ್ಯೋ ಹಿತೇ ರತಾಃ - ಸರ್ವೇಭ್ಯೋ ಭೂತೇಭ್ಯೋ ಹಿತಮೇವ ಚಿಂತಯಂತಃ, ತದೇವ ಆಚರಂತಿ ।

ಜ್ಞಾನವತಾಂ ಯಥಾಜ್ಞಾನಂ ಭಗವತ್ಪ್ರಾಪ್ತೇಃ ಅರ್ಥಸಿದ್ಧತ್ವಾತ್ ಅನುವಾದಮಾತ್ರಮ್ , ಇತ್ಯಾಹ -

ನ ತ್ವಿತಿ ।

ಜ್ಞಾನಿನೋ ಭಗವತ್ಪ್ರಾಪ್ತಿಃ ಸಿದ್ಧಾ ಏವ, ಇತ್ಯತ್ರ ಪ್ರಮಾಣಮ್ ಆಹ -

ಜ್ಞಾನೀ ತ್ವಿತಿ ।

ಜ್ಞಾನವತಾಂ ಭಗವತ್ಪ್ರಾಪ್ತೌ ತ ಏವ ಯುಕ್ತತಮಾಃ ವಕ್ತವ್ಯಾಃ, ಕಥಂ ಸಗುಣಬ್ರಹ್ಮೋಪಾಸಕಾನ್ ಯುಕ್ತತಮಾನ್ ಉಕ್ತವಾನ್ ಅಸಿ? ಇತಿ ಆಶಂಕ್ಯ, ಆಹ -

ನ ಹೀತಿ

॥ ೪ ॥