अद्वैतशारदा | दक्षिणाम्नाय श्रीशारदापीठम्, शृङ्गेरी

అన్యే త్వేవమజానన్తః శ్రుత్వాన్యేభ్య ఉపాసతే ।
తేఽపి చాతితరన్త్యేవ మృత్యుం శ్రుతిపరాయణాః ॥ ౨౫ ॥

అన్యే తు ఎషు వికల్పేషు అన్యతమేనాపి ఎవం యథోక్తమ్ ఆత్మానమ్ అజానన్తః అన్యేభ్యః ఆచార్యేభ్యః శ్రుత్వా ‘ఇదమేవ చిన్తయత’ ఇతి ఉక్తాః ఉపాసతే శ్రద్దధానాః సన్తః చిన్తయన్తి । తేఽపి చ అతితరన్త్యేవ అతిక్రామన్త్యేవ మృత్యుమ్ , మృత్యుయుక్తం సంసారమ్ ఇత్యేతత్ । శ్రుతిపరాయణాః శ్రుతిః శ్రవణం పరమ్ అయనం గమనం మోక్షమార్గప్రవృత్తౌ పరం సాధనం యేషాం తే శ్రుతిపరాయణాః ; కేవలపరోపదేశప్రమాణాః స్వయం వివేకరహితాః ఇత్యభిప్రాయః । కిము వక్తవ్యమ్ ప్రమాణం ప్రతి స్వతన్త్రాః వివేకినః మృత్యుమ్ అతితరన్తి ఇతి అభిప్రాయః ॥ ౨౫ ॥

అన్యే త్వితి ; ఇదమితి ; శ్రద్దధానా ఇతి ; తేఽపీతి ; శ్రుతీతి ; కిమితి ;

అధమతమాన్ అధికారిణో మోక్షమార్గే ప్రవృత్తిం ప్రతిలమ్భయతి -

అన్యే త్వితి ।

ఆచార్యాధీనాం శ్రుతిమేవ అభినయతి -

ఇదమితి ।

ఉపాసనమేవ వివృణోతి -

శ్రద్దధానా ఇతి ।

పరోపదేశాత్ ప్రవృత్తానామపి ప్రవృత్తేః సాఫల్యమాహ-

తేఽపీతి ।

తేషాం ముఖ్యాధికారిత్వం వ్యావర్తయతి -

శ్రుతీతి ।

‘తేఽపి’ ఇతి అపినా సూచితమర్థమ్ ఆహ -

కిమితి

॥ ౨౫ ॥