ಸ್ವರೂಪತ್ವೇನ ಸ್ವಭೂತತ್ವಂ ವಾರಯತಿ -
ಮದೀಯೇತಿ ।
ಈಶ್ವರೀಂ ಚಿಚ್ಛಕ್ತಿಂ ವ್ಯಾವರ್ತಯತಿ -
ತ್ರಿಗುಣಾತ್ಮಿಕೇತಿ ।
ಸಾಂಖ್ಯೀಯಪ್ರಕೃತಿರಪಿ ಮದೀಯಾ, ಇತಿ ವ್ಯಾವರ್ತಿತಾ ।
ಯೋನಿಶಬ್ದೇನ ಸರ್ವಾಣಿ ಭವನಯೋಗ್ಯಾನಿ ಕಾರ್ಯಾಣಿ ಪ್ರತಿ ಉಪಾದಾನತ್ವಮ್ ಅಭಿಪ್ರೇತಮ್ , ಇತ್ಯಾಹ -
ಸರ್ವಭೂತಾನಾಮ್ ಇತಿ ।
ಪ್ರಕೃತೇಃ ಮಹತ್ವಂ ಸಾಧಯತಿ -
ಸರ್ವೇತಿ ।
ಸರ್ವಕಾರ್ಯವ್ಯಾಪ್ತಿಮ್ ಆದಾಯ, ಯೋನಾವೇವ ಬ್ರಹ್ಮಶಬ್ದಃ ।
ಲಿಂಗವೈಷಮ್ಯಾತ್ ಮಹದ್ಬ್ರಹ್ಮ ಇತಿ ಅರ್ಥಾಂತರಂ ಕಿಂಚಿತ್ , ಇತ್ಯಾಶಂಕ್ಯ ಆಹ -
ಯೋನಿರಿತಿ ।
ತಸ್ಮಿನ್ನಿತ್ಯಾದಿ ವ್ಯಾಚಷ್ಟೇ -
ತಸ್ಮಿನ್ನಿತಿ ।
ಈದೃಶಸ್ಯ ಕ್ಷೇತ್ರಕ್ಷೇತ್ರಜ್ಞಸಂಯೋಗಸ್ಯ ಭೂತಕಾರಣತ್ವಮ್ ಇತಿ ವಕ್ತುಮ್ ಉಪಕ್ರಮ್ಯ, ಕಿಮಿದಮ್ ಅನ್ಯತ್ ಆದರ್ಶಿತಮ್ , ಇತ್ಯಾಶಂಕ್ಯ ಆಹ -
ಕ್ಷೇತ್ರೇತಿ ।
ಗರ್ಭಶಬ್ದೇನ ಉಕ್ತಸಂಯೋಗಸ್ಯ ಫಲಂ ದರ್ಶಯತಿ -
ಸಂಭವ ಇತಿ ।
‘ಆದಿಕರ್ತಾ ಸ ಭೂತಾನಾಮ್ ‘ ಇತಿ ಸ್ಮೃತ್ಯಾ ಹಿರಣ್ಯಗರ್ಭಕಾರ್ಯತ್ವಾವಗಮಾತ್ ಭೂತಾನಾಂ, ಕಥಂ ಯಥೋಕ್ತಗರ್ಭಾಧಾನನಿಮಿತ್ತತ್ವಮ್ ? ಇತ್ಯಾಶಂಕ್ಯ ಆಹ -
ಹಿರಣ್ಯಗರ್ಭೇತಿ
॥ ೩ ॥