ಬ್ರಹ್ಮಶಬ್ದಸ್ಯ ಅಸತಿ ಬಾಧಕೇ ಮುಖ್ಯಾರ್ಥದಗ್ರಣಮ್ ಅಭಿಪ್ರೇತ್ಯ ಆಹ -
ಪರಮಾತ್ಮನ ಇತಿ ।
ತಂ ಪ್ರತಿ ಪ್ರತ್ಯಗಾತ್ಮನೋ ಯತ್ ಪ್ರತಿಷ್ಠಾತ್ವಂ ತತ್ ಉಪಪಾದಯತಿ -
ಪ್ರತಿತಿಷ್ಠತೀತಿ ।
ಯತ್ ಬ್ರಹ್ಮ ಪ್ರತ್ಯಗಾತ್ಮನಿ ಪ್ರತಿತಿಷ್ಠತಿ, ತತ್ ಕಿಂವಿಶೇಷಣಮ್ ಇತ್ಯಪೇಕ್ಷಾಯಾಮ್ ಉಕ್ತಮ್ -
ಅಮೃತಸ್ಯೇತ್ಯಾದಿ ।
ತತ್ರ ಅಮೃತಶಬ್ದೇನ ಅವ್ಯಯಶಬ್ದಸ್ಯ ಪುನರುಕ್ತಿಂ ಪರಿಹರತಿ -
ಅವಿಕಾರಿಣ ಇತಿ ।
ನಿತ್ಯತ್ವಮ್ - ಅಪಕ್ಷಯರಾಹಿತ್ಯಮ್ । ತೇನ ಪೂರ್ವಾಭ್ಯಾಮ್ ಅಪೌನರುಕ್ತ್ಯಮ್ ।
ಪ್ರಸಿದ್ಧಾರ್ಥಸ್ಯ ಧರ್ಮಶಬ್ದಸ್ಯ ಬ್ರಹ್ಮಣಿ ಅನುಪಪತ್ತಿಮ್ ಆಶಂಕ್ಯ, ಆಹ -
ಜ್ಞಾನೇತಿ ।
ಅಥ ಇಂದ್ರಿಯಸಂಬಂಧೋತ್ಥಂ ಸುಖಂ ವ್ಯಾವರ್ತಯಿತುಮ್ ‘ಐಕಾಂತಿಕಸ್ಯ’ ಇತ್ಯುಕ್ತಮ್ । ಅಕ್ಷರಾರ್ಥಮ್ ಉಕ್ತ್ವಾ, ವಾಕ್ಯಾರ್ಥಮ್ ಆಹ -
ಅಮೃತಾದೀತಿ ।
ಪ್ರತಿಷ್ಠಾ ಯಸ್ಮಾತ್ ಇತಿ ಪೂರ್ವೇಣ ಸಂಬಂಧಃ । ತಸ್ಮಾತ್ ಪ್ರತ್ಯಗಾತ್ಮಾ ಪರಮಾತ್ಮತಯಾ ನಿಶ್ಚೀಯತೇ ಸಮ್ಯಗ್ಜ್ಞಾನೇನ, ಇತಿ ಯೋಜನಾ ।
ಅಸ್ಯ ಶ್ಲೋಕಸ್ಯ, ಪೂರ್ವಶ್ಲೋಕೇನ ಏಕವಾಕ್ಯಾತಾಮ್ ಆಹ -
ತದೇತದಿತಿ ।
ವಿವಕ್ಷಿತಂ ವಾಕ್ಯಾರ್ಥಂ ಪ್ರಪಂಚಯತಿ -
ಯಯೇತಿ ।
ಸಾ ಶಕ್ತಿಃ ಬ್ರಹ್ಮೈವ, ಇತಿ ಕಥಂ ಸಾಮಾನಾಧಿಕರಣ್ಯಮ್ ? ತತ್ರ ಆಹ -
ಶಕ್ತೀತಿ ।
ವ್ಯಾಖ್ಯಾಂತರಮ್ ಆಹ -
ಅಥವೇತಿ ।
ವಿಶೇಷಣಾನಿ ಪೂರ್ವವತ್ ಅಪೌನರುಕ್ತ್ಯಾನಿ ನೇತವ್ಯಾನಿ । ತದನೇನ ಅಧ್ಯಾಯೇನ ಕ್ಷೇತ್ರಕ್ಷೇತ್ರಜ್ಞಸಂಯೋಗಸ್ಯ ಸಂಸಾರಕಾರಣತ್ವಂ ಪಂಚಪ್ರಶ್ನನಿರೂಪಣದ್ವಾರೇಣ ಚ ಸಮ್ಯಗ್ಜ್ಞಾನಸ್ಯ ಸಕಲಸಂಸಾರನಿವರ್ತಕತ್ವಮ್ , ಇತ್ಯೇತತ್ ಉಪಪಾದಯತಾ ಮುಮುಕ್ಷೋಃ ಯತ್ನಸಾಧ್ಯಂ ಗುಣೈಃ ಅಚಾಲ್ಯತ್ವಾದಿ ಮುಕ್ತಸ್ಯ ಅಯತ್ನಸಿದ್ಧಂ ಲಕ್ಷಣಮ್ ಇತಿ ನಿರ್ಧಾರಿತಮ್
॥ ೨೭ ॥
ಇತಿ ಶ್ರೀಮತ್ಪರಮಹಂಸ - ಪರಿವ್ರಜಕಾಚಾರ್ಯ - ಶ್ರೀಮಚ್ಛುದ್ಧಾನಂದಪೂಜ್ಯಪಾದಶಿಷ್ಯಾನಂದಜ್ಞಾನ - ವಿರಚಿತೇ ಶ್ರೀಮದ್ಭಗವದ್ಗೀತಾಶಾಂಕರಭಾಷ್ಯವ್ಯಾಖ್ಯಾನೇ ಚತುರ್ದಶೋಽಧ್ಯಾಯಃ
॥ ೧೪ ॥