ಭಕ್ತಿಯೋಗೇನ ಗುಣಾತ್ಯಯೇ ದರ್ಶಿತೇ, ನಾಶಿತ್ವೇ ತೇಷಾಂ,ವಿನಾ ಜ್ಞಾನೇನ ಅನತ್ಯಯಾತ್  ಅನಾಶಿತ್ವೇನ,ತೇನಾಪಿ ತದಯೋಗ್ಯತ್ವಾತ್ ನ ಜ್ಞಾನಂ ಗುಣಾತ್ಯಯಹೇತುಃ ಇತಿ ಆಶಂಕಾಂ ನಿರಸ್ಯ, ಸಾಕ್ಷಾದೇವ ಶ್ರವಣಾದಿಹೇತುಂ ಸಂನ್ಯಾಸಂ ವಿಧಿತ್ಸುಃ ಬ್ರಹ್ಮತ್ವಸ್ಯ ಪರಮಪುರುಷಾರ್ಥತಾಂ ವಿವಕ್ಷುಃ ಅಧ್ಯಾಯಾಂತರಮಾರಭತೇ -

ಯಸ್ಮಾದಿತಿ ।

ಕರ್ಮಿಣೋ ಜ್ಞಾನಿನಶ್ಚ ಶಾಸ್ತ್ರೇ ಅಧಿಕೃತಾಃ ।  ತತ್ರ ಕರ್ಮಿಣಾಂ ಕರ್ಮಾನುಕೂಲಂ ಫಲಂ ಈಶ್ವರಾಯತ್ತಮ್ , “ಫಲಮತ ಉಪಪತ್ತೇಃ“ (ಬ್ರ. ಸೂ. ೩ - ೨ - ೩೭) ಇತಿ ನ್ಯಾಯಾತ್ । ಜ್ಞಾನಿನಾಮಪಿ ತತ್ ಫಲಮ್ ಈಶ್ವರಾಯತ್ತಮೇವ, “ತತೋ ಹ್ಯಸ್ಯ ಬಂಧವಿಪರ್ಯಯೌ “ (ಬ್ರ. ಸೂ.೩ - ೨ - ೫) ಇತ್ಯುಕ್ತತ್ವಾತ್ । ಯಸ್ಮಾತ್ ಏವಂ, ತಸ್ಮಾತ್ , ಯೇ ಭಕ್ತ್ಯಾಖ್ಯೇನ ಯೋಗೇನ ಮಾಮೇವ ಸೇವಂತೇ, ತೇ ಮತ್ಪ್ರಸಾದದ್ವಾರಾ ಜ್ಞಾನಂ ಪ್ರಾಪ್ಯ ತೇನ ಗುಣಾತೀತಾಃ ಮುಕ್ತಾಃ ಭವಂತೀತಿ ಸ್ಥಿತಮ್ , ಇತ್ಯರ್ಥಃ ।

ಯೇ ತು ಆತ್ಮನಃ ತತ್ತ್ವಮೇವ ಸಂದೇಹಾದ್ಯಪೋಹೇನ ಜಾನಂತಿ ತೇ ತೇನ ಜ್ಞಾನೇನ ಗುಣಾತೀತಾಃ ಸಂತಃ ಮುಕ್ತಿಂ ಗಚ್ಛಂತೀತಿ ಕಿಮು ವಕ್ತವ್ಯಮ್ , ಇತಿ ಅರ್ಥಸಿದ್ಧಮರ್ಥಮ್ ಆಹ -

ಕಿಮುವಕ್ತವ್ಯಮಿತಿ ।

ಆತ್ಮತತ್ತ್ವಾಜ್ಞಾನಂ ಯತಃ ಸಂಸಾರಹೇತುಃ, ಜ್ಞಾನಂ ಮೋಕ್ಷಾನುುಕೂಲಮ್ , ಅತಃ ಅರ್ಜುನೇನ ಕಿಂ ತತ್ ? ಇತಿ ಅಪೃಷ್ಟಮಪಿ ತತ್ತ್ವಂ ಭಗವಾನ್ ಉಕ್ತವಾನ್ , ಪ್ರಶ್ನಾಭಾವೇಽಪಿ ತಸ್ಯ ತದ್ವ್ಯುತ್ಪಾದನಾಭಿಮಾನಾತ್ ಇತ್ಯಾಹ -

ಅತ ಇತಿ ।

ತತ್ತ್ವೇ ವಿವಕ್ಷಿತೇ ಕಿಮಿತಿ ಸಂಸಾರೋ ವರ್ಣ್ಯತೇ ? ತತ್ರ ಆಹ -

ತತ್ರೇತಿ ।

ಅಧ್ಯಾಯಾದಿಃ ಸಪ್ತಮ್ಯರ್ಥಃ ।

ವೈರಾಗ್ಯಮಪಿ ಕಿಮಿತಿ ಮೃಗ್ಯತೇ? ತತ್ರ ಆಹ -

ವಿರಕ್ತಸ್ಯೇತಿ ।

ಇತಿ ವೈರಾಗ್ಯಾಯ ಸಂಸಾರವರ್ಣನಮ್ , ಇತಿ ಶೇಷಃ ।