अद्वैतशारदा | दक्षिणाम्नाय श्रीशारदापीठम्, शृङ्गेरी

త్రివిధం నరకస్యేదం ద్వారం నాశనమాత్మనః ।
కామః క్రోధస్తథా లోభస్తస్మాదేతత్త్రయం త్యజేత్ ॥ ౨౧ ॥

త్రివిధం త్రిప్రకారం నరకస్య ప్రాప్తౌ ఇదం ద్వారం నాశనమ్ ఆత్మనః, యత్ ద్వారం ప్రవిశన్నేవ నశ్యతి ఆత్మా ; కస్మైచిత్ పురుషార్థాయ యోగ్యో న భవతి ఇత్యేతత్ , అతః ఉచ్యతే ‘ద్వారం నాశనమాత్మనః’ ఇతి । కిం తత్ ? కామః క్రోధః తథా లోభః । తస్మాత్ ఎతత్ త్రయం త్యజేత్ । యతః ఎతత్ ద్వారం నాశనమ్ ఆత్మనః తస్మాత్ కామాదిత్రయమేతత్ త్యజేత్ ॥ ౨౧ ॥

కస్మైచిదితి ; కిం తదితి ; యత ఇతి ;

కథం ఆత్మనః నిత్యస్య నాశశఙ్కా ? ఇతి, తత్ర ఆహ -

కస్మైచిదితి ।

త్రివిధమపి సామాన్యతః దర్శితం ఆకాఙ్క్షాద్వారా విశేషతః దర్శయతి -

కిం తదితి ।

తస్మాత్ ఇతి వ్యాచష్టే -

యత ఇతి ।

కామాదిత్యాగే సతి, అనర్థాచరణశ్రేయఃప్రతిబన్ధనివృత్తీ స్యాతాం ఇతి భావః

॥ ౨౧ ॥