ಕಾಮ್ಯಾನಿ ವರ್ಜಯಿತ್ವಾ ನಿತ್ಯನೈಮಿತ್ತಿಕಾನಿ ಫಲಾಭಿಲಾಪಾತ್ ಋತೇ, ಕರ್ತವ್ಯಾನಿ ಇತಿ ಅಕ್ತಂ ಪಕ್ಷಂ ಪ್ರತಿಪಕ್ಷನಿರಾಸೇನ ದ್ರಢಯಿತುಂ ವಿಪ್ರತಿಪತ್ತಿಮ್ ಆಹ -
ತ್ಯಾಜ್ಯಮಿತಿ ।
ಕರ್ಮಣಃ ಸರ್ವಸ್ಯ ದೋಷವತ್ತ್ವೇ ಹೇತುಮ್ ಆಹ -
ಬಂಧೇತಿ ।
ದೋಷವತ್ ಇತ್ಯೇತತ್ ದೃಷ್ಟಾಂತತ್ವೇನ ವ್ಯಾಚಷ್ಟೇ -
ಅಥವೇತಿ ।
ಕರ್ಮಣಿ ಅನಧಿಕೃತಾನಾಮ್ ಅಕರ್ಮಿಣಾಮೇವ ಕರ್ಮ ತ್ಯಾಜ್ಯಂ, ಕರ್ಮಿಣಾಂ ತತ್ತ್ಯಾಗೇ ಪ್ರತ್ಯವಾಯಾತ್ , ಇತಿ ಆಶಂಕ್ಯ ಆಹ -
ಅಧಿಕೃತಾನಾಮಿತಿ ।
ನ ಹಿ ತೇಷಾಮಪಿ ಕರ್ಮ ತ್ಯಜತಾಂ ಪ್ರತ್ಯವಾಯಃ, ಹಿಂಸಾದಿಯುಕ್ತಸ್ಯ ಕರ್ಮಣಃ ಅನುಷ್ಠಾನೇ ಪರಂ ಪ್ರತ್ಯವಾಯಾತ್ ಇತಿ ಭಾವಃ । ಸಾಂಖ್ಯಾದಿಪಕ್ಷಸಮಾಪ್ತೌ ಇತಿಶಬ್ದಃ ।
ಮೀಮಾಂಸಕಪಕ್ಷಮಾಹ -
ತತ್ರೈವೇತಿ ।
ಕರ್ಮಾಧಿಕೃತೇಷ್ವೇವ ಇತಿ ಯಾವತ್ ।