काम्यकर्मणि त्याज्यत्वेन द्वेषम् अभिनयति -

किमिति ।

उभयत्र  द्वेषं प्रीतिं च न करोति इति सामान्येन उक्तं कर्तारं प्रश्नपूर्वकं विशेषतः निर्दिशति -

कः पुनरिति ।

त्यागी इति उक्तं त्यागिनम् अभिव्यनक्ति -

पूर्वोक्तेनेति ।

कर्मणि सङ्गस्य तत्फलस्य च त्यागेन इति यावत् ।

उक्तमेव त्यागिनं विवृणोति -

यः कर्मणि इति ।

तत्फलं त्यक्त्वा इति सम्बन्धः । काम्ये निषिद्धे च कर्मणि बन्धहेतुः इति न द्वेष्टि, नित्ये नैमित्तिके च मोक्षहेतुः इति न प्रीयते ।

तत्र कालविशेषं पृच्छति -

कदेति ।

नित्यादिकर्मणा फलाभिसन्धिवर्जितेन क्षपितकल्मषस्य सत्त्वं - यथार्थग्रहणसामर्थ्यम् उद्बुध्यते, तेन समावेशदशायाम् उक्तप्रीतिद्वेषयोः अभावः भवति इत्याह -

उच्यते इति ।

अत एवेति -

समुद्बुद्धयथार्यग्रहणसमर्थसमाविष्टत्वात् इत्यर्थः ।

छिन्नसंशयत्वमेव विशदयति -

आत्मेति ।

परं निःश्रेयसं तस्य च साधनं सम्यग्ज्ञानमेव इति योजना ।