ஶமாதி³பரிசர்யாந்தகர்மணாம் விப⁴ஜ்ய உக்தாநாம் அப்⁴யுத³யம் ப²லம் ஆதௌ³ உபந்யஸ்யதி-
ஏதேஷாமிதி ।
ஸ்வபா⁴வத: - விஹிதத்வாதே³வ மோக்ஷாபேக்ஷாம் அந்தரேண அநுஷ்டா²நாத் இத்யர்த²: ।
தத்ர ப்ரமாணம் ஆஹ -
வர்ணா: இதி ।
ஶேஷஶப்³தே³ந பு⁴க்தகர்மண: அதிரிக்தம் கர்ம அநுஶயஶப்³தி³தம் உச்யதே । ப்ரத்யேகம் தே³ஶாதி³பி⁴: விஶிஷ்டஶப்³த³: ஸம்ப³த்⁴யதே । ஆதி³ஶப்³தே³ந ‘தத்³யதா² ஆம்ரே ப²லார்தே² நிர்மிதே சா²யாக³ந்தௌ⁴ அநூத்பத்³யேதே, ஏவம் த⁴ர்மம் சர்யமாணம் அர்தா²: அநூத்பத்³யந்தே । ந த⁴ர்ம ஹாநி: ப⁴வதி । ‘ இதி ஸ்ம்ருதி: க்³ருஹ்யதே ।
இதஶ்ச உக்தாநாம் கர்மணாம் ஸ்வர்க³ப²லத்வம் யுக்தம் இத்யாஹ -
புராணே சேதி ।
உக்தம் ஹி -
“யஸ்து ஸம்யக் கரோத்யேவம் க்³ருஹஸ்த²: பரமம் விதி⁴ம் ।
தத்³வர்ணப³ந்த⁴முக்தோ(அ)ஸௌ லோகாந் ஆப்நோத்யநுத்தமாந்“ இதி ।
“ யஸ்த்வேதாம் நியத: சர்யாம் வாநப்ரஸ்த²ஶ்சரேந்முநி: ।
ஸ த³ஹத்யக்³நிவத்³தோ³ஷாந் ஜயேல்லோகாம்ஶ்ச ஶாஶ்வதாந் ॥“ இதி ।
“மோக்ஷாஶ்ரமோ யஶ்சரதே யதோ²க்தம் ஶுசி: ஸுஸங்கல்பிதபு³த்³தி⁴யுக்த: ।
அநிந்த⁴நஜ்யோதிரிவ ப்ரஶாந்தம் ஸ ப்³ரஹ்மலோகம் ஶ்ரயதே த்³விஜாதி: ॥ “
இதி ச । “ஸர்வ ஏதே புண்யலோகா ப⁴வந்தி" இதி ஶ்ருதி: சகாரார்த²: ।
யதி³ புந: மோக்ஷாபேக்ஷயா உக்தாநி கர்மாணி அநுஷ்டீ²யேரந் , ததா³ மோக்ஷப²லத்வம் தேஷாம் ஸேத்ஸ்யதி இத்யாஹ-
காரணாந்தராதி³தி ।
ததே³வ காரணாந்தரம், யத் மோக்ஷாபேக்ஷயா தேஷாம் அநுஷ்டா²நம் ।