ஸம்ப³ந்தி⁴நோ: ஸத³ஸதோரேவ அஸம்யோகே³(அ)பி ஸமவாய: ஸத³ஸதோ: ஸம்ப⁴வேத் இதி, தஸ்ய நித்யத்வாத் அந்யதரஸம்ப³ந்தா⁴பா⁴வே(அ)பி ஸ்தி²தே: ஆவஶ்யகத்வாத் இதி ஶங்கதே -
நந்விதி ।
ஸத³ஸதோ: மித²: ஸம்ப³ந்த⁴ஸ்ய அத்³ருஷ்டத்வாத் ந இதி நிராசஷ்டே -
ந வந்த்⁴யேதி ।
க⁴டாதி³ப்ராக³பா⁴வஸ்ய அத்யந்தாபா⁴வத்வாபா⁴வாத் வந்த்⁴யாபுத்ராதி³விலக்ஷணதயா ஸ்வகாரணஸம்ப³ந்த⁴: ஸித்⁴யதி இதி ஆஶங்க்ய ஆஹ -
க⁴டாதே³ரிதி ।
உப⁴யத்ர அபா⁴வஸ்வபா⁴வாவிஶேஷே(அ)பி, கஸ்யாசித் காரணஸம்ப³ந்த⁴:, ந இதரஸ்ய, இதி விஶேஷே, ஹேத்வபா⁴வாத் ந ப்ராக³பா⁴வஸ்ய காரணஸம்ப³ந்த⁴: ஸம்ப⁴வதி இத்யர்த²: ।
க⁴டாதி³ப்ராக³பா⁴வஸ்ய ஸப்ரதியோகி³கத்வம், வந்த்⁴யாபுத்ராதே³: நைவம் இதி விஶேஷம் ஆஶங்க்ய தூ³ஷயதி-
ஏகஸ்யேதி ।
ப்ராக³பா⁴வஸ்யேவ ப்ரத்⁴வம்ஸாபா⁴வாதே³ரபி ஸப்ரதியோகி³கத்வாவிஶேஷே ஸ்வகாரணேந ஸம்ப³ந்தா⁴விஶேஷ: ஸ்யாத் இத்யர்த²: ।
ப்ராக³பா⁴வப்ரத்⁴வம்ஸாபா⁴வயோ: விஶேஷாபா⁴வே ப²லிதம் ஆஹ -
அஸதி சேதி ।
கபாலஶப்³த³: த⁴டகாரணீபூ⁴தம்ருத³வயவவிஷய: । ஸர்வ: வ்யவஹார: க⁴டாஶ்ரித: ஜந்மநாஶாதி³வ்யவஹார: । ப்ரத்⁴வம்ஸாபா⁴வஸ்து க⁴டஸ்யைவ அபா⁴வத்வே ஸத்யபி ந க⁴டத்வம் ஆபத்³யதே । நாபி காரணேந ஸம்ப³த்⁴யதே ।
ந ச உத்பத்த்யாதி³வ்யவஹாரயோக்³ய: ப⁴வதி, இதி ஏதத் அயுக்தம், ப்ராக³பா⁴வேந அஸ்ய விஶேஷாபா⁴வாத் இத்யாஹ -
ந த்விதி ।
அஸமஞ்ஜஸம் இத்யநேந இதிஶப்³த³: ஸம்ப³த்⁴யதே ।
அஸமஞ்ஜஸாந்தரம் ஆஹ -
ப்ரத்⁴வம்ஸாதீ³தி ।
அந்யோந்யாபா⁴வாத்யந்தாபா⁴வௌ அதி³பதா³ர்தௌ² । க்கசித் இதி தே³ஶகாலயோ: க்³ரஹணம் । வ்யவஹார: ஜந்மாதி³ரேவ । ப்ராக³பா⁴வ: ந உத்பத்த்யாதி³வ்யவஹாரயோக்³ய:, அபா⁴வத்வாத் , ப்ரத்⁴வம்ஸாதி³வத் இத்யர்த²: ।