ఇతశ్చ విహితం కర్మ దోషవదపి కర్తవ్యం, ప్రకారాన్తరాసమ్భవాత్ , ఇతి ఉక్తానువాదపూర్వకం కథయతి-

స్వభావేత్యాదినా ।

న హి కృమిః విషజః విషనిమిత్తం మరణం ప్రతిపద్యతే । తథా అయమ్ అధికృతః పురుషః దోషవదపి విహితం కర్మ కుర్వన్ పాపం న ఆప్నోతి ఇతి ఉక్తమ్ ఇత్యర్థః । తర్హి దోషరహితమేవ భిక్షాటనాది సర్వైః అనుష్ఠీయతామ్ ।

అతః న పాపప్రాప్త్యాశఙ్కా ఇతి ఆశఙ్క్య ఆహ -

పరేతి ।

ఉక్తమ్ ఇతి అనువర్తతే ।

తర్హి పాపప్రాప్తిశఙ్కాం పరిహర్తుమ్ అకర్మనిష్ఠత్వమేవ సర్వేషాం స్యాత్ ఇతి ఆశఙ్క్య, జ్ఞానాభావాత్ నైవమ్ ఇత్యాహ -

అనాత్మజ్ఞ ఇతి ।

పూర్వవత్ అత్రాపి సమ్బన్ధః ।

ప్రకారాన్తరాసమ్భవకృతం ఫలమ్ ఆహ -

అత ఇతి ।

సహ జాయతే ఇతి సహజం - స్వభావనియతం నిత్యం కర్మ ।