తదేవ జ్ఞానం భక్తిపరాధీనం వివృణోతి -
యావానితి ।
ఆకాశకల్పత్వమ్ అనవచ్ఛిన్నత్వమ్ అసఙ్గత్వం చ ।
చైతన్యస్య విషయసాపేక్షత్వం ప్రతిక్షిపతి -
అద్వైతమితి ।
యే తు ద్రవ్యబోధాత్మత్వమ్ ఆత్మనః మన్యన్తే, తాన్ ప్రతి ఉక్తం -
చైతన్యమాత్రేతి ।
ఆత్మని తన్మాత్రేఽపి ధర్మాన్తరమ్ ఉపేత్య ధర్మధర్మిత్వం ప్రత్యాహ -
ఎకరసమితి ।
సర్వవిక్రియారాహిత్యోక్త్యా కౌటస్థ్యమ్ ఆత్మనః వ్యవస్థాపయతి -
అజమితి ।
ఉక్తవిక్రియాభావే తద్ధేత్వజ్ఞానాసమ్బన్ధం హేతుమ్ ఆహ -
అభయమితి ।
తత్త్వజ్ఞానమ్ అనూద్య తత్ఫలం విదేహకైవల్యం లమ్భయతి -
తత ఇతి ।
తత్త్వజ్ఞానస్య తస్మాత్ అనన్తరప్రవేశక్రియాయాశ్చ భిన్నత్వం ప్రాప్తం ప్రత్యాహ -
నాత్రేతి ।
భిన్నత్వాభావే కా గతిః భేదోక్తేః, ఇతి ఆశఙ్క్య, ఔపచారికత్వమ్ ఆహ-
కిం తర్హీతి ।
ప్రవేశః ఇతి శేషః ।
బ్రహ్మప్రాప్తిరేవ ఫలాన్తరమ్ ఇతి ఆశఙ్క్య బ్రహ్మాత్మనోః భేదాభావాత్ న జ్ఞానాతిరిక్తా తత్ప్రాప్తిః ఇత్యాహ -
క్షేత్రజ్ఞం చేతి ।