ಪರಮತ್ವಂ ಗ್ರಂಥಸ್ಯ ನಿರತಿಶಯಪುರುಷಾರ್ಥಸಾಧನತ್ವಮ್ ಇತ್ಯಾಹ-
ಪರಮಮಿತಿ ।
ಗೋಪ್ಯತ್ವಮ್ ಅಸ್ಯ ರಹಸ್ಯಾರ್ಥವಿಷಯತ್ವಾತ್ ।
ಯಥೋಕ್ತಸಂವಾದಸ್ಯ ಗ್ರಂಥತಃ ಅರ್ಥತಶ್ಚ ಭಕ್ತೇಷು ಸ್ಥಾಪನೇ ದೃಷ್ಟಾಂತಮ್ ಆಹ -
ಯಥೇತಿ ।
ಮಯಿ - ವಾಸುದೇವೇ ಭಗವತಿ, ಅನನ್ಯಭಕ್ತೇ ತ್ವಯಿ ಯಥಾ ಮಯಾ ಗ್ರಂಥಃ ಅರ್ಥತಃ ಸ್ಥಾಪಿತಃ, ತಥಾ ಮದ್ಭಕ್ತೇಷು ಅನ್ಯೇಷ್ವಪಿ ಯಃ ಗ್ರಂಥಮ್ ಇಮಂ ಸ್ಥಾಪಯಿಷ್ಯತಿ, ತಸ್ಯ ಇದಂ ಫಲಮ್ ಇತಿ ಉತ್ತರತ್ರ ಸಂಬಂಧಃ ।
ನ ಅಭಕ್ತಾಯ ಇತಿ ಭಕ್ತೇಃ ಅಧಿಕಾರಿವಿಶೇಷಣತ್ವೋಕ್ತೇಃ ಮದ್ಭಕ್ತೇಷು ಇತಿ ಪುನಃ ಭಕ್ತಿಗ್ರಹಣಮ್ ಅನರ್ಥಕಮ್ ಇತಿ ಆಶಂಕ್ಯ ಆಹ -
ಭಕ್ತೇರಿತಿ ।
ಶುಶ್ರೂಷಾದಿಸಹಕಾರಿರಾಹಿತ್ಯಂ ಕೇವಲಶಬ್ದಾರ್ಥಃ । ಯದ್ಯಪಿ ಮಾತ್ರಶಬ್ದೇನ ಸೂಚಿತಮ್ ಏತತ್ , ತಥಾಪಿ ಇತರೇಣ ಸ್ಫುಟೀಕೃತಮ್ ಇತಿ ಅವಿರೋಧಃ ।
ಪ್ರಶ್ನಪೂರ್ವಕಮ್ ಅಭಿಧಾನಪ್ರಕಾರಮ್ ಅಭಿನಯತಿ -
ಕಥಮ್ ಇತ್ಯಾದಿನಾ ।
ಭಗವತಿ ಭಕ್ತಿಕರಣಪ್ರಕಾರಂ ಪ್ರಕಟಯತಿ -
ಭಗವತ ಇತಿ ।
ಯಚ್ಛಬ್ದಾಪೇಕ್ಷಿತಂ ಪೂರಯತಿ -
ತಸ್ಯೇತಿ ।
ಮಾಮ್ ಏಷ್ಯತ್ಯೇವ ಇತಿ ಅನ್ವಯಂ ಗೃಹೀತ್ವಾ ವ್ಯಾಚಷ್ಠೇ -
ಮುಚ್ಯತ ಏವೇತಿ
॥ ೬೮ ॥