ನನು ಸರ್ವೇಷಾಂ ಮುಕ್ತಿಸಾಧನಾನಾಂ ಧ್ಯಾನಸ್ಯ ಶ್ರೇಷ್ಠತ್ವಾತ್ , ತನ್ನಿಷ್ಠಸ್ಯ ಮುಮುಕ್ಷೋಃ ನಾಸ್ತಿ ವಿದ್ಯಾಸಂಪ್ರದಾನೇ ಪ್ರವೃತ್ತಿಃ, ಇತಿ ತತ್ರಾಹ -

ಕಿಂ ಚೇತಿ ।

ಇತಶ್ಚ ವಿದ್ಯಾಸಂಪ್ರದಾನಂ ಮುಮುಕ್ಷುಣಾ ಯಥೋಕ್ತವಿಶೇಷಣವತೇ ಕರ್ತವ್ಯಮ್ ಇತ್ಯರ್ಥಃ । ವರ್ತಮಾನೇಷು ಮಧ್ಯೇ ತತಃ ಅನ್ಯಃ ನಾಸ್ತ್ಯೇವ ಪ್ರಿಯಕೃತ್ತಮಃ । ನಾಪಿ ಆತೀತೇಷು ತಾದೃಕ್ ಕಶ್ಚಿತ್ ಆಸೀತ್ ಇತಿ ಶೇಷಃ । ತಸ್ಮಾತ್ ವಿದ್ಯಾಸಂಪ್ರದಾಯಕರ್ತುಃ ಸಕಾಶಾತ್ ಇತ್ಯರ್ಥಃ । ಧ್ಯಾನನಿಷ್ಠಸ್ಯ ಶ್ರೇಷ್ಠತ್ವೇಽಪಿ ಸ್ವಸಂಪ್ರದಾಯಪ್ರವಕ್ತುಃ ಶ್ರೇಷ್ಠತಮತ್ವಾತ್ ಉಚಿತಾ ವಿದ್ಯಾಸಂಪ್ರದಾನೇ ಪ್ರವೃತ್ತಿಃ ಇತಿ ಭಾವಃ

॥ ೬೯ ॥