ತದೇವಂ ಕ್ರತ್ವಸಂಪತ್ತಿನಿಮಿತ್ತಂ ಪಿತುರನಿಷ್ಟಂ ಫಲಂ ಪುತ್ರೇಣ ಸತಾ ನಿವಾರಣೀಯಂ ಮಯಾ ಆತ್ಮಪ್ರದಾನೇನಾಪಿ ಕ್ರತುಸಂಪತ್ತಿಂ ಕೃತ್ವೇತ್ಯೇವಂ ಮನ್ಯಮಾನಃ ಪಿತರಮುಪಗಮ್ಯ ಸ ಹೋವಾಚ ಪಿತರಮ್ — ಹೇ ತತ ತಾತ ಕಸ್ಮೈ ಋತ್ವಿಗ್ವಿಶೇಷಾಯ ದಕ್ಷಿಣಾರ್ಥಂ ಮಾಂ ದಾಸ್ಯಸೀತಿ ಪ್ರಯಚ್ಛಸೀತ್ಯೇತತ್ । ಸ ಏವಮುಕ್ತೇನ ಪಿತ್ರಾ ಉಪೇಕ್ಷ್ಯಮಾಣೋಽಪಿ ದ್ವಿತೀಯಂ ತೃತೀಯಮಪಿ ಉವಾಚ — ಕಸ್ಮೈ ಮಾಂ ದಾಸ್ಯಸಿ ಕಸ್ಮೈ ಮಾಂ ದಾಸ್ಯಸೀತಿ । ನಾಯಂ ಕುಮಾರಸ್ವಭಾವ ಇತಿ ಕ್ರುದ್ಧಃ ಸನ್ ಪಿತಾ ತಂ ಹ ಪುತ್ರಂ ಕಿಲ ಉವಾಚ ಮೃತ್ಯವೇ ವೈವಸ್ವತಾಯ ತ್ವಾ ತ್ವಾಂ ದದಾಮೀತಿ ॥