ಸ ಏವಮುಕ್ತಃ ಪುತ್ರಃ ಏಕಾಂತೇ ಪರಿದೇವಯಾಂಚಕಾರ । ಕಥಮಿತಿ, ಉಚ್ಯತೇ — ಬಹೂನಾಂ ಶಿಷ್ಯಾಣಾಂ ಪುತ್ರಾಣಾಂ ವಾ ಏಮಿ ಗಚ್ಛಾಮಿ ಪ್ರಥಮಃ ಸನ್ ಮುಖ್ಯಯಾ ಶಿಷ್ಯಾದಿವೃತ್ತ್ಯೇತ್ಯರ್ಥಃ । ಮಧ್ಯಮಾನಾಂ ಚ ಬಹೂನಾಂ ಮಧ್ಯಮಃ ಮಧ್ಯಮಯೈವ ವೃತ್ತ್ಯಾ ಏಮಿ । ನಾಧಮಯಾ ಕದಾಚಿದಪಿ । ತಮೇವಂ ವಿಶಿಷ್ಟಗುಣಮಪಿ ಪುತ್ರಂ ಮಾಮ್ ‘ಮೃತ್ಯವೇ ತ್ವಾ ದದಾಮಿ’ ಇತ್ಯುಕ್ತವಾನ್ ಪಿತಾ । ಸಃ ಕಿಂಸ್ವಿತ್ ಯಮಸ್ಯ ಕರ್ತವ್ಯಂ ಪ್ರಯೋಜನಂ ಮಯಾ ಪ್ರದತ್ತೇನ ಕರಿಷ್ಯತಿ ಯತ್ಕರ್ತವ್ಯಮ್ ಅದ್ಯ ? ನೂನಂ ಪ್ರಯೋಜನಮನಪೇಕ್ಷ್ಯೈವ ಕ್ರೋಧವಶಾದುಕ್ತವಾನ್ ಪಿತಾ । ತಥಾಪಿ ತತ್ಪಿತುರ್ವಚೋ ಮೃಷಾ ಮಾ ಭೂದಿತಿ ॥