తదేవం క్రత్వసమ్పత్తినిమిత్తం పితురనిష్టం ఫలం పుత్రేణ సతా నివారణీయం మయా ఆత్మప్రదానేనాపి క్రతుసమ్పత్తిం కృత్వేత్యేవం మన్యమానః పితరముపగమ్య స హోవాచ పితరమ్ — హే తత తాత కస్మై ఋత్విగ్విశేషాయ దక్షిణార్థం మాం దాస్యసీతి ప్రయచ్ఛసీత్యేతత్ । స ఎవముక్తేన పిత్రా ఉపేక్ష్యమాణోఽపి ద్వితీయం తృతీయమపి ఉవాచ — కస్మై మాం దాస్యసి కస్మై మాం దాస్యసీతి । నాయం కుమారస్వభావ ఇతి క్రుద్ధః సన్ పితా తం హ పుత్రం కిల ఉవాచ మృత్యవే వైవస్వతాయ త్వా త్వాం దదామీతి ॥