బహూనామేమి ప్రథమో బహూనామేమి మధ్యమః ।
కిం స్విద్యమస్య కర్తవ్యం యన్మయాద్య కరిష్యతి ॥ ౫ ॥
స ఎవముక్తః పుత్రః ఎకాన్తే పరిదేవయాఞ్చకార । కథమితి, ఉచ్యతే — బహూనాం శిష్యాణాం పుత్రాణాం వా ఎమి గచ్ఛామి ప్రథమః సన్ ముఖ్యయా శిష్యాదివృత్త్యేత్యర్థః । మధ్యమానాం చ బహూనాం మధ్యమః మధ్యమయైవ వృత్త్యా ఎమి । నాధమయా కదాచిదపి । తమేవం విశిష్టగుణమపి పుత్రం మామ్ ‘మృత్యవే త్వా దదామి’ ఇత్యుక్తవాన్ పితా । సః కింస్విత్ యమస్య కర్తవ్యం ప్రయోజనం మయా ప్రదత్తేన కరిష్యతి యత్కర్తవ్యమ్ అద్య ? నూనం ప్రయోజనమనపేక్ష్యైవ క్రోధవశాదుక్తవాన్ పితా । తథాపి తత్పితుర్వచో మృషా మా భూదితి ॥