ನಚಿಕೇತಾಸ್ತ್ವಾಹ — ಯದಿ ದಿತ್ಸುರ್ವರಾನ್ , ಶಾಂತಸಂಕಲ್ಪಃ ಉಪಶಾಂತಃ ಸಂಕಲ್ಪೋ ಯಸ್ಯ ಮಾಂ ಪ್ರತಿ ‘ಯಮಂ ಪ್ರಾಪ್ಯ ಕಿಂ ನು ಕರಿಷ್ಯತಿ ಮಮ ಪುತ್ರಃ’ ಇತಿ, ಸಃ ಶಾಂತಸಂಕಲ್ಪಃ ಸುಮನಾಃ ಪ್ರಸನ್ನಚಿತ್ತಶ್ಚ ಯಥಾ ಸ್ಯಾತ್ ವೀತಮನ್ಯುಃ ವಿಗತರೋಷಶ್ಚ ಗೌತಮಃ ಮಮ ಪಿತಾ ಮಾ ಅಭಿ ಮಾಂ ಪ್ರತಿ ಹೇ ಮೃತ್ಯೋ ; ಕಿಂಚ, ತ್ವತ್ಪ್ರಸೃಷ್ಟಂ ತ್ವಯಾ ವಿನಿರ್ಮುಕ್ತಂ ಪ್ರೇಷಿತಂ ಗೃಹಂ ಪ್ರತಿ ಮಾ ಮಾಮ್ ಅಭಿವದೇತ್ ಪ್ರತೀತಃ ಲಬ್ಧಸ್ಮೃತಿಃ, ‘ಸ ಏವಾಯಂ ಪುತ್ರೋ ಮಮಾಗತಃ’ ಇತ್ಯೇವಂ ಪ್ರತ್ಯಭಿಜಾನನ್ನಿತ್ಯರ್ಥಃ । ಏತತ್ಪ್ರಯೋಜನಂ ತ್ರಯಾಣಾಂ ವರಾಣಾಂ ಪ್ರಥಮಮ್ ಆದ್ಯಂ ವರಂ ವೃಣೇ ಪ್ರಾರ್ಥಯೇ ಯತ್ಪಿತುಃ ಪರಿತೋಷಣಮ್ ॥