ಇದಂ ಶ್ರುತೇರ್ವಚನಮ್ — ಲೋಕಾದಿಂ ಲೋಕಾನಾಮಾದಿಂ ಪ್ರಥಮಶರೀರಿತ್ವಾತ್ ಅಗ್ನಿಂ ತಂ ಪ್ರಕೃತಂ ನಚಿಕೇತಸಾ ಪ್ರಾರ್ಥಿತಮ್ ಉವಾಚ ಉಕ್ತವಾನ್ಮೃತ್ಯುಃ ತಸ್ಮೈ ನಚಿಕೇತಸೇ । ಕಿಂಚ, ಯಾಃ ಇಷ್ಟಕಾಃ ಚೇತವ್ಯಾಃ ಸ್ವರೂಪೇಣ ಯಾವತೀರ್ವಾ ಸಂಖ್ಯಯಾ ಯಥಾ ವಾ ಚೀಯತೇಽಗ್ನಿರ್ಯೇನ ಪ್ರಕಾರೇಣ ಸರ್ವಮೇತದುಕ್ತವಾನಿತ್ಯರ್ಥಃ । ಸ ಚಾಪಿ ನಚಿಕೇತಾಃ ತತ್ ಮೃತ್ಯುನೋಕ್ತಂ ಪ್ರತ್ಯವದತ್ ಯಥಾವತ್ಪ್ರತ್ಯಯೇನಾವದತ್ ಪ್ರತ್ಯುಚ್ಚಾರಿತವಾನ್ । ಅಥ ಅಸ್ಯ ಪ್ರತ್ಯುಚ್ಚಾರಣೇನ ತುಷ್ಟಃ ಸನ್ ಮೃತ್ಯುಃ ಪುನರೇವಾಹ ವರತ್ರಯವ್ಯತಿರೇಕೇಣಾನ್ಯಂ ವರಂ ದಿತ್ಸುಃ ॥