శ్రవణాయాపి బహుభిర్యో న లభ్యః శృణ్వన్తోఽపి బహవో యం న విద్యుః ।
ఆశ్చర్యో వక్తా కుశలోఽస్య లబ్ధా ఆశ్చర్యో జ్ఞాతా కుశలానుశిష్టః ॥ ౭ ॥
ప్రాయేణ హ్యేవంవిధ ఎవ లోకః । యస్తు శ్రేయోర్థీ స సహస్రేషు కశ్చిదేవాత్మవిద్భవతి త్వద్విధః యస్మాత్ శ్రవణాయాపి శ్రవణార్థం శ్రోతుమపి యః న లభ్యః ఆత్మా బహుభిః అనేకైః, శృణ్వన్తోఽపి బహవః అనేకే అన్యే యమ్ ఆత్మానం న విద్యుః న విదన్తి అభాగినః అసంస్కృతాత్మానో న విజానీయుః । కిఞ్చ, అస్య వక్తాపి ఆశ్చర్యః అద్భుతవదేవ, అనేకేషు కశ్చిదేవ భవతి । తథా శ్రుత్వాపి అస్య ఆత్మనః కుశలః నిపుణ ఎవానేకేషు లబ్ధా కశ్చిదేవ భవతి । యస్మాత్ ఆశ్చర్యః జ్ఞాతా కశ్చిదేవ కుశలానుశిష్టః కుశలేన నిపుణేనాచార్యేణానుశిష్టః సన్ ॥