పరీక్ష్య శిష్యం విద్యాయోగ్యతాం చావగమ్యాహ — అన్యత్ పృథగేవ శ్రేయః నిఃశ్రేయసం తథా అన్యత్ ఉతైవ అపి చ ప్రేయః ప్రియతరమపి తే శ్రేయఃప్రేయసీ ఉభే నానార్థే భిన్నప్రయోజనే సతీ పురుషమ్ అధికృతం వర్ణాశ్రమాదివిశిష్టం సినీతః బధ్నీతః । తాభ్యాం విద్యావిద్యాభ్యామాత్మకర్తవ్యతయా ప్రయుజ్యతే సర్వః పురుషః । ప్రేయఃశ్రేయసోర్హి అభ్యుదయామృతత్వార్థీ పురుషః ప్రవర్తతే । అతః శ్రేయఃప్రేయఃప్రయోజనకర్తవ్యతయా తాభ్యాం బద్ధ ఇత్యుచ్యతే సర్వః పురుషః । తే యద్యప్యేకైకపురుషార్థసమ్బన్ధినీ విద్యావిద్యారూపత్వాద్విరుద్ధే ఇత్యన్యతరాపరిత్యాగేనైకేన పురుషేణ సహానుష్ఠాతుమశక్యత్వాత్తయోః హిత్వా అవిద్యారూపం ప్రేయః, శ్రేయ ఎవ కేవలమ్ ఆదదానస్య ఉపాదానం కుర్వతః సాధు శోభనం శివం భవతి । యస్త్వదూరదర్శీ విమూఢో హీయతే వియుజ్యతే అర్థాత్ పురుషార్థాత్పారమార్థికాత్ప్రయోజనాన్నిత్యాత్ ప్రచ్యవత ఇత్యర్థః । కోఽసౌ ? య ఉ ప్రేయః వృణీతే ఉపాదత్తే ఇత్యేతత్ ॥