యతశ్చ అజీర్యతాం వయోహానిమప్రాప్నువతామ్ అమృతానాం సకాశమ్ ఉపేత్య ఉపగమ్య ఆత్మన ఉత్కృష్టం ప్రయోజనాన్తరం ప్రాప్తవ్యం తేభ్యః ప్రజానన్ ఉపలభమానః స్వయం తు జీర్యన్ మర్త్యః జరామరణవాన్ క్వధఃస్థః కుః పృథివీ అధశ్చాసావన్తరిక్షాదిలోకాపేక్షయా తస్యాం తిష్ఠతీతి క్వధఃస్థః సన్ కథమేవమవివేకిభిః ప్రార్థనీయం పుత్రవిత్తాద్యస్థిరం వృణీతే । ‘క్వ తదాస్థః’ ఇతి వా పాఠాన్తరమ్ । అస్మిన్పక్షే చైవమక్షరయోజనా— తేషు పుత్రాదిషు ఆస్థా ఆస్థితిః తాత్పర్యేణ వర్తనం యస్య స తదాస్థః । తతోఽధికతరం పురుషార్థం దుష్ప్రాపమపి అభిప్రేప్సుః క్వ తదాస్థో భవేత్ ? న కశ్చిత్తదసారజ్ఞస్తదర్థీ స్యాదిత్యర్థః । సర్వో హ్యుపర్యుపర్యేవ బుభూషతి లోకః । తస్మాన్న పుత్రవిత్తాదిలోభైః ప్రలోభ్యోఽహమ్ । కిఞ్చ, అప్సరఃప్రముఖాన్ వర్ణరతిప్రమోదాన్ అనవస్థితరూపతయా అభిధ్యాయన్ నిరూపయన్ యథావత్ అతిదీర్ఘే జీవితే కః వివేకీ రమేత ॥