ఎతత్తుల్యం యది మన్యసే వరం వృణీష్వ విత్తం చిరజీవికాం చ ।
మహాభూమౌ నచికేతస్త్వమేధి కామానాం త్వా కామభాజం కరోమి ॥ ౨౪ ॥
ఎతత్తుల్యమ్ ఎతేన యథోపదిష్టేన సదృశమ్ అన్యమపి యది మన్యసే వరమ్ , తమపి వృణీష్వ । కిఞ్చ, విత్తం ప్రభూతం హిరణ్యరత్నాది చిరజీవికాం చ సహ విత్తేన వృణీష్వేత్యేతత్ । కిం బహునా ? మహాభూమౌ మహత్యాం భూమౌ రాజా నచికేతః త్వమ్ ఎధి భవ । కిఞ్చాన్యత్ , కామానాం దివ్యానాం మానుషాణాం చ త్వా త్వాం కామభాజం కామభాగినం కామార్హం కరోమి, సత్యసఙ్కల్పో హ్యహం దేవః ॥