తం దుర్దర్శం గూఢమనుప్రవిష్టం గుహాహితం గహ్వరేష్ఠం పురాణమ్ ।
అధ్యాత్మయోగాధిగమేన దేవం మత్వా ధీరో హర్షశోకౌ జహాతి ॥ ౧౨ ॥
యం త్వం జ్ఞాతుమిచ్ఛస్యాత్మానం తం దుర్దర్శం దుఃఖేన దర్శనమస్యేతి దుర్దర్శః అతిసూక్ష్మత్వాత్ తమ్ , గూఢం గహనమ్ , అనుప్రవిష్టం ప్రాకృతవిషయవిజ్ఞానైః ప్రచ్ఛన్నమిత్యేతత్ । గుహాహితం గుహాయాం బుద్ధౌ హితం నిహితం స్థితం తత్రోపలభ్యమానత్వాత్ । గహ్వరేష్ఠం గహ్వరే విషమే అనేకానర్థసఙ్కటే తిష్ఠతీతి గహ్వరేష్ఠమ్ । యత ఎవం గూఢమనుప్రవిష్టో గుహాహితశ్చ, అతోఽసౌ గహ్వరేష్ఠః ; అతో దుర్దర్శః । తం పురాణం పురాతనమ్ అధ్యాత్మయోగాధిగమేన విషయేభ్యః ప్రతిసంహృత్య చేతస ఆత్మని సమాధానమధ్యాత్మయోగః తస్యాధిగమః ప్రాప్తిః తేన మత్వా దేవమ్ ఆత్మానం ధీరః హర్షశోకౌ ఆత్మన ఉత్కర్షాపకర్షయోరభావాత్ జహాతి ॥