ఎతచ్ఛ్రుత్వా నచికేతాః పునరాహ — యద్యహం యోగ్యః, ప్రసన్నశ్చాసి భగవన్ , మాం ప్రతి అన్యత్ర ధర్మాత్ శాస్త్రీయాద్ధర్మానుష్ఠానాత్తత్ఫలాత్తత్కారకేభ్యశ్చ పృథగ్భూతమిత్యర్థః । తథా అన్యత్ర అధర్మాత్ విహితాకరణరూపాత్ పాపాత్ , తథా అన్యత్రాస్మాత్కృతాకృతాత్ , కృతం కార్యమకృతం కారణమస్మాదన్యత్ర । కిఞ్చ, అన్యత్ర భూతాచ్చ అతిక్రాన్తాత్కాలాత్ భవ్యాచ్చ భవిష్యతశ్చ తథా అన్యత్ర వర్తమానాత్ । కాలత్రయేణ యన్న పరిచ్ఛిద్యత ఇత్యర్థః । యదీదృశం వస్తు సర్వవ్యవహారగోచరాతీతం పశ్యసి జానాసి తద్వద మహ్యమ్ ॥