ಏತಚ್ಛ್ರುತ್ವಾ ನಚಿಕೇತಾಃ ಪುನರಾಹ — ಯದ್ಯಹಂ ಯೋಗ್ಯಃ, ಪ್ರಸನ್ನಶ್ಚಾಸಿ ಭಗವನ್ , ಮಾಂ ಪ್ರತಿ ಅನ್ಯತ್ರ ಧರ್ಮಾತ್ ಶಾಸ್ತ್ರೀಯಾದ್ಧರ್ಮಾನುಷ್ಠಾನಾತ್ತತ್ಫಲಾತ್ತತ್ಕಾರಕೇಭ್ಯಶ್ಚ ಪೃಥಗ್ಭೂತಮಿತ್ಯರ್ಥಃ । ತಥಾ ಅನ್ಯತ್ರ ಅಧರ್ಮಾತ್ ವಿಹಿತಾಕರಣರೂಪಾತ್ ಪಾಪಾತ್ , ತಥಾ ಅನ್ಯತ್ರಾಸ್ಮಾತ್ಕೃತಾಕೃತಾತ್ , ಕೃತಂ ಕಾರ್ಯಮಕೃತಂ ಕಾರಣಮಸ್ಮಾದನ್ಯತ್ರ । ಕಿಂಚ, ಅನ್ಯತ್ರ ಭೂತಾಚ್ಚ ಅತಿಕ್ರಾಂತಾತ್ಕಾಲಾತ್ ಭವ್ಯಾಚ್ಚ ಭವಿಷ್ಯತಶ್ಚ ತಥಾ ಅನ್ಯತ್ರ ವರ್ತಮಾನಾತ್ । ಕಾಲತ್ರಯೇಣ ಯನ್ನ ಪರಿಚ್ಛಿದ್ಯತ ಇತ್ಯರ್ಥಃ । ಯದೀದೃಶಂ ವಸ್ತು ಸರ್ವವ್ಯವಹಾರಗೋಚರಾತೀತಂ ಪಶ್ಯಸಿ ಜಾನಾಸಿ ತದ್ವದ ಮಹ್ಯಮ್ ॥