ಸರ್ವೇ ವೇದಾ ಇತಿ ।

ವೇದೈಕದೇಶಾ ಉಪನಿಷದಃ । ಅನೇನೋಪನಿಷದೋ ಜ್ಞಾನಸಾಧನತ್ವೇನ ಸಾಕ್ಷಾದ್ವಿನಿಯುಕ್ತಾಸ್ತಪಾಂಸಿ ಕರ್ಮಾಣಿ ಶುದ್ಧಿದ್ವಾರೇಣಾವಗತಿಸಾಧನಾನಿ ।

ಮಂದಾಧಿಕಾರಿಣೋ ವಿಚಾರಾಸಮರ್ಥಸ್ಯ ಕ್ರಮೇಣಾವಗತಿಸಾಧನಂ ಸಂಕ್ಷಿಪ್ಯಾಽಽಹ -

ಸಂಗ್ರಹೇಣೇತಿ ।

ಯಸ್ಯ ಶಬ್ದಸ್ಯೋಚ್ಚಾರಣೇ ಯತ್ಸ್ಫುರತಿ ತತ್ತಸ್ಯ ವಾಚ್ಯಂ ಪ್ರಸಿದ್ಧಂ ಸಮಾಹಿತಚಿತ್ತಸ್ಯೋಂಕಾರೋಚ್ಚಾರಣೇ ಯದ್ವಿಷಯಾನುಪರಕ್ತಂ ಸಂವೇದನಂ ಸ್ಫುರತಿ ತದೋಂಕಾರಮವಲಂಬ್ಯ ತದ್ವಾಚ್ಯಂ ಬ್ರಹ್ಮಾಸ್ಮೀತಿ ಧ್ಯಾಯೇತ್ತತ್ರಾಪ್ಯಸಮರ್ಥ ಓಂಶಬ್ದ ಏವ ಬ್ರಹ್ಮದೃಷ್ಟಿಂ ಕುರ್ಯಾದಿತ್ಯರ್ಥಃ ॥ ೧೫ - ೧೬ ॥