ಅನ್ಯತ್ರ ಧರ್ಮಾದಿತ್ಯಾದಿನಾ ಪೃಷ್ಟಸ್ಯಾತ್ಮನೋಽಶೇಷವಿಶೇಷರಹಿತಸ್ಯಾಲಂಬನತ್ವೇನ ಪ್ರತೀಕತ್ವೇನ ಚೋಂಕಾರೋ ನಿರ್ದಿಷ್ಟಃ ಅಪರಸ್ಯ ಚ ಬ್ರಹ್ಮಣೋ ಮಂದಮಧ್ಯಮಪ್ರತಿಪತ್ತೄನ್ಪ್ರತಿ । ಅಥೇದಾನೀಂ ತಸ್ಯೋಂಕಾರಾಲಂಬನಸ್ಯಾತ್ಮನಃ ಸಾಕ್ಷಾತ್ಸ್ವರೂಪನಿರ್ದಿಧಾರಯಿಷಯೇದಮುಚ್ಯತೇ । ನ ಜಾಯತೇ ನೋತ್ಪದ್ಯತೇ ಮ್ರಿಯತೇ ವಾ ನ ಮ್ರಿಯತೇ ಚ ಉತ್ಪತ್ತಿಮತೋ ವಸ್ತುನೋಽನಿತ್ಯಸ್ಯಾನೇಕಾ ವಿಕ್ರಿಯಾಃ, ತಾಸಾಮಾದ್ಯಂತೇ ಜನ್ಮವಿನಾಶಲಕ್ಷಣೇ ವಿಕ್ರಿಯೇ ಇಹಾತ್ಮನಿ ಪ್ರತಿಷಿಧ್ಯೇತೇ ಪ್ರಥಮಂ ಸರ್ವವಿಕ್ರಿಯಾಪ್ರತಿಷೇಧಾರ್ಥಂ ನ ಜಾಯತೇ ಮ್ರಿಯತೇ ವೇತಿ । ವಿಪಶ್ಚಿತ್ ಮೇಧಾವೀ ಅಪರಿಲುಪ್ತಚೈತನ್ಯಸ್ವಭಾವತ್ವಾತ್ । ಕಿಂಚ, ನಾಯಮಾತ್ಮಾ ಕುತಶ್ಚಿತ್ ಕಾರಣಾಂತರಾತ್ ಬಭೂವ ನ ಪ್ರಭೂತಃ । ಅಸ್ಮಾಚ್ಚಾತ್ಮನೋ ನ ಬಭೂವ ಕಶ್ಚಿದರ್ಥಾಂತರಭೂತಃ । ಅತೋಽಯಮಾತ್ಮಾ ಅಜೋ ನಿತ್ಯಃ ಶಾಶ್ವತಃ ಅಪಕ್ಷಯವಿವರ್ಜಿತಃ । ಯೋ ಹ್ಯಶಾಶ್ವತಃ, ಸೋಽಪಕ್ಷೀಯತೇ ; ಅಯಂ ತು ಶಾಶ್ವತಃ ಅತ ಏವ ಪುರಾಣಃ ಪುರಾಪಿ ನವ ಏವೇತಿ । ಯೋ ಹ್ಯವಯವೋಪಚಯದ್ವಾರೇಣಾಭಿನಿರ್ವರ್ತ್ಯತೇ, ಸ ಇದಾನೀಂ ನವಃ, ಯಥಾ ಕುಡ್ಯಾದಿಃ ; ತದ್ವಿಪರೀತಸ್ತ್ವಾತ್ಮಾ ಪುರಾಣೋ ವೃದ್ಧಿವಿವರ್ಜಿತ ಇತ್ಯರ್ಥಃ । ಯತ ಏವಮ್ , ಅತಃ ನ ಹನ್ಯತೇ ನ ಹಿಂಸ್ಯತೇ ಹನ್ಯಮಾನೇ ಶಸ್ತ್ರಾದಿಭಿಃ ಶರೀರೇ ; ತತ್ಸ್ಥೋಽಪ್ಯಾಕಾಶವದೇವ ॥