கத²ம் புநராத்மாநம் ஜாநாதீதி, உச்யதே — அணோ: ஸூக்ஷ்மாத் அணீயாந் ஶ்யாமாகாதே³ரணுதர: । மஹதோ மஹத்பரிமாணாத் மஹீயாந் மஹத்தர: ப்ருதி²வ்யாதே³: ; அணு மஹத்³வா யத³ஸ்தி லோகே வஸ்து, தத்தேநைவாத்மநா நித்யேநாத்மவத்ஸம்ப⁴வதி । ததா³த்மநா விநிர்முக்தமஸத்ஸம்பத்³யதே । தஸ்மாத³ஸாவேவாத்மா அணோரணீயாந்மஹதோ மஹீயாந் , ஸர்வநாமரூபவஸ்தூபாதி⁴கத்வாத் । ஸ ச ஆத்மா அஸ்ய ஜந்தோ: ப்³ரஹ்மாதி³ஸ்தம்ப³பர்யந்தஸ்ய ப்ராணிஜாதஸ்ய கு³ஹாயாம் ஹ்ருத³யே நிஹித: ஆத்மபூ⁴த: ஸ்தி²த இத்யர்த²: । தம் ஆத்மாநம் த³ர்ஶநஶ்ரவணமநநவிஜ்ஞாநலிங்க³ம் அக்ரது: அகாம:, த்³ருஷ்டாத்³ருஷ்டபா³ஹ்யவிஷயேப்⁴ய உபரதபு³த்³தி⁴ரித்யர்த²: । யதா³ சைவம் ததா³ மநஆதீ³நி கரணாநி தா⁴தவ: ஶரீரஸ்ய தா⁴ரணாத்ப்ரஸீத³ந்தீத்யேஷாம் தா⁴தூநாம் ப்ரஸாதா³தா³த்மநோ மஹிமாநம் கர்மநிமித்தவ்ருத்³தி⁴க்ஷயரஹிதம் பஶ்யதி அயமஹமஸ்மீதி ஸாக்ஷாத்³விஜாநாதி ; ததோ விக³தஶோகோ ப⁴வதி ॥